২০০২ৰ গুজৰাটৰ ৰক্তাক্ত সংঘৰ্ষৰ ওপৰত বিবিচি-এ নিৰ্মাণ কৰা তথ্যচিত্ৰত তেতিয়াৰ গুজৰাটৰ মুখ্যমন্ত্ৰী আৰু এতিয়া দেশৰ প্ৰধান নৰেন্দ্ৰ মোদীক প্ৰত্যক্ষভাৱে দায়ী বুলি দাবী কৰিছে। দুটা খণ্ডত নিৰ্মিত এই তথ্যচিত্ৰখন ভাৰতত নিষিদ্ধ কৰাৰ পাছতে দেশৰ ৰাজনীতিত বিষয়টোৱে তুমুল চাঞ্চল্যৰ সৃষ্টি কৰাৰ লগতে শাসক বিৰোধীৰ মাজত তীব্ৰ বাক্যবাণৰো সূত্ৰপাত ঘটাইছে।
এই ধাৰাক অব্যাহত ৰাখি বিবিচিৰ তথ্যচিত্ৰখনৰ সন্দৰ্ভত অৱশেষত নিজৰ প্ৰতিক্ৰিয়া প্ৰকাশ কৰিছে কংগ্ৰেছ নেতা তথা সাংসদ শশী থাৰুৰে। কংগ্ৰেছ নেথা শশী থাৰুৰ মন্তব্যই কংগ্ৰেছসহ বিৰোধীক নিৰাশ কৰাৰ বিপৰীতে শাসকীয় বিজেপিক উৎসাহিতহে কৰিব বুলি ধাৰণা কৰা হৈছে।
জ্যেষ্ঠ কংগ্ৰেছ নেতাগৰাকীয়ে টুইট কৰি কয় যে গুজৰাট দাঙ্গাৰ সন্দৰ্ভত এতিয়া আলোচনা কৰি কোনো লাভ নাই। শশী থাৰুৰ এই মন্তব্যই এতিয়া অন্য এক বিৰ্কতৰো সূত্ৰপাত ঘটোৱা পৰিলক্ষিত হৈছে।
এক টুইটৰ প্ৰত্যুত্তৰত শশী থাৰুৰে কয় যে “গুজৰাট কাণ্ডৰ ঘাঁ সম্পূৰ্ণৰূপে শুকাই যোৱা নাই, কিন্তু দেশৰ উচ্চতম ন্যায়ালয়ে ইয়াৰ অন্তিম ৰায় প্ৰদান কৰিছে। আমি এই বিষয়ত আলোচনা কৰি আৰু কোনো লাভ নাই, এনে বহু বিষয় আছে যিবোৰ আলোচনা কৰাৰ প্ৰয়োজন আছে। মানুহে মোৰ সৈতে অসন্মতি প্ৰকাশ কৰিব পাৰে, কিন্তু সাম্প্ৰদায়িক বিষয়ত চাৰি দশক আৰু গুজৰাট দাঙ্গাৰ পীড়িত লোকৰ পক্ষত থিয় দিয়াৰ দুটা দশকৰ তথ্যক বিকৃত কৰাটো লজ্জাজনক।”
কংগ্ৰেছ নেতাগৰাকীৰ এই মন্তব্যৰ পিছতে বহু টুইটাৰ ব্যৱহাৰকাৰীয়ে শশী থাৰুক আক্ৰমণৰ লক্ষ্য কৰি লোৱা দেখা গৈছে। অশোক সিং নামৰ এজন ব্যৱহাৰকাৰীয়ে লিখিছে যে ১৯১৯ চনৰ জালিয়ানৱালা বাগ হত্যাকাণ্ডৰ বাবে এই শশী থাৰুৰে ব্ৰিটিছ চৰকাৰে ক্ষমা প্ৰাৰ্থনা বিচাৰি দাবী কৰিছিল আৰু এতিয়া তেওঁ ভাৰতীয়সকলক ২০০২ চনৰ গুজৰাটৰ হত্যাকাণ্ড পাহৰি আগবাঢ়ি যাবলৈ কৈছে!
শশী থাৰুৰ এই মন্তব্যই নিশ্চিতভাৱে কংগ্ৰেছসহ বিৰোধীক পশ্চাদপটলৈ ঠেলি দিয়াৰ বিপৰীতে শাসকীয় বিজেপি দল আৰু প্ৰধানমন্ত্ৰী নৰেন্দ্ৰ মোদীক সকাহ প্ৰদান কৰিব বুলিয়ে ধাৰণা কৰা হৈছে।