মহাৰাষ্ট্ৰৰ বীৰ যোদ্ধা তথা মাৰাঠা সাম্ৰাজ্যৰ প্ৰতিষ্ঠাপক ছাত্ৰপতি শিৱাজী মহাৰাজক লৈ দুই দশক পূৰ্বে সৃষ্টি হোৱা এক বিতৰ্কৰ অৱশেষত অন্ত পৰিছে। ২০০৩ চনত প্ৰকাশিত এখন গ্ৰন্থত শিৱাজী মহাৰাজৰ বিষয়ে কিছুমান আপত্তিজনক আৰু ভুল তথ্য উল্লেখ কৰাৰ বাবে অক্সফৰ্ড ইউনিভাৰ্চিটি প্ৰেছে শেহতীয়াকৈ ৰাজহুৱাভাৱে ক্ষমা বিচাৰিছে। এই সন্দৰ্ভত প্ৰতিষ্ঠানটোৱে এখন বাতৰি কাকতত জাননী জাৰি কৰি শিৱাজী মহাৰাজৰ ত্ৰয়োদশ বংশধৰ উদয়নৰাজে ভোছলে আৰু দেশৰ জনসাধাৰণৰ ওচৰত গভীৰ দুখ প্ৰকাশ কৰিছে।
আমেৰিকান লেখক জেমছ লেইনে লিখা “Shivaji: Hindu King in Islamic India” নামৰ গ্ৰন্থখনক লৈয়েই এই সমগ্ৰ বিতৰ্কৰ সূত্ৰপাত হৈছিল। অক্সফৰ্ড ইউনিভাৰ্চিটি প্ৰেছে স্বীকাৰ কৰিছে যে গ্ৰন্থখনৰ কেইবাটাও পৃষ্ঠাত এনে কিছুমান কথা লিখা হৈছিল যিবোৰৰ কোনো সত্যতা নাই। এই পুথিখন প্ৰকাশ পোৱাৰ পাছতে মহাৰাষ্ট্ৰত তীব্ৰ প্ৰতিবাদৰ সৃষ্টি হৈছিল আৰু লেখকজনক তথ্য যোগান ধৰাৰ অভিযোগত পুনেৰ ভাণ্ডাৰকাৰ অৰিয়েণ্টেল ৰিচাৰ্চ ইনষ্টিটিউটত কেইবাজনো উত্তেজিত লোকে আক্ৰমণ চলাইছিল।
প্ৰতিষ্ঠানটোৱে জাৰি কৰা এই জাননীখনত কোৱা হৈছে যে গ্ৰন্থখনৰ ৩১, ৩৩, ৩৪ আৰু ৯৩ পৃষ্ঠাত থকা বিষয়বস্তুসমূহ আছিল ভুল আৰু ইয়াৰ বাবে মানুহৰ আৱেগত আঘাত লাগিছিল। প্ৰাক্তন পৰিচালন সঞ্চালক ছাইদ মঞ্জাৰ খানৰ হৈ জাৰি কৰা এই ক্ষমাপ্ৰাৰ্থনাত কোৱা হৈছে যে ইয়াৰ ফলত যি দুৰ্দশা আৰু মানসিক যন্ত্ৰণাৰ সৃষ্টি হ’ল, তাৰ বাবে তেওঁলোকে সঁচাকৈয়ে অনুতপ্ত। ইমান দিনে চলি থকা এক দীৰ্ঘদিনীয়া বিবাদৰ পাছত বিশ্ববিখ্যাত এই প্ৰকাশন সংস্থাটোৰ এনে পদক্ষেপে বিশেষ চৰ্চা লাভ কৰিছে।
