বিশ্বকাপত পুনৰ বিতৰ্ক, এইবাৰ ছালাহৰ দেশ ইজিপ্তৰ জাৰ্ছীত ফিফাৰ নিষেধাজ্ঞা
হাইটিৰ পাছত এইবাৰ জাৰ্ছী বিতৰ্কত মহম্মদ ছালাহৰ ইজিপ্ত। ছালাহৰ দলৰ সাতটা তৰা থকা জাৰ্ছীত আপত্তি দৰ্শাইছে ফিফাই। প্ৰথমখন খেলত নমাৰ আগতেই এই জাৰ্ছী সলনি কৰিব লাগিব ইজিপ্তে। ফুটবলৰ নিয়ন্ত্ৰক সংস্থাটোৱে এই কথা স্পষ্টকৈ জনাই দিছে। সাতবাৰৰ আফ্ৰিকা চেম্পিয়ন দলটোৰ জাৰ্ছীত দুটা সালসলনি কৰাৰ নিৰ্দেশ দিছে ফিফাই।
প্ৰকৃততে ইজিপ্তৰ জাৰ্ছীৰ সন্মুখৰ প্ৰতীক বা বেজটোৰ ওপৰত সাতটা তৰা আঁকি থোৱা আছে। এই তৰাকেইটা ইজিপ্তে তেওঁলোকৰ সাতবাৰৰ আফ্ৰিকা কাপ অফ নেছনছ জয়ৰ প্ৰতীক হিচাপে ব্যৱহাৰ কৰে। কিন্তু ফিফাৰ নিয়ম অনুসৰি বিশ্বকাপৰ জাৰ্ছীত আন কোনো প্ৰতিযোগিতা জয়ৰ বাবে তৰা ব্যৱহাৰ কৰিব নোৱাৰি। কেৱল কোনো দলে বিশ্বকাপ জিকিলেহে তেওঁলোকে জাৰ্ছীৰ প্ৰতীকৰ ওপৰত তৰা ব্যৱহাৰ কৰিব পাৰে। যিদৰে ব্ৰাজিলে নিজৰ জাৰ্ছীত পাঁচটা তৰা ব্যৱহাৰ কৰে। যিহেতু ইজিপ্তে বিশ্বকাপ জিকা নাই সেয়েহে তেওঁলোকৰ সেই সাতটা তৰা আঁতৰাই দিয়াৰ নিৰ্দেশ দিছে ফিফাই।
কেৱল এই তৰা আঁতৰোৱাই নহয়, ইয়াৰ লগতে ছালাহৰ দলৰ জাৰ্ছীত যি নাম আৰু সংখ্যা লিখা আছে, সেই লিখনিৰ ৰঙো সলনি কৰিবলৈ কোৱা হৈছে। আচলতে ইজিপ্তৰ মূল জাৰ্ছীত সোণালী ৰঙেৰে খেলুৱৈসকলৰ নাম আৰু জাৰ্ছীৰ সংখ্যা লিখা থাকে। ফিফাৰ যুক্তি অনুসৰি সেই ৰঙেৰে লিখা থাকিলে খেল পৰিচালক আৰু সম্প্ৰচাৰকসকলৰ অসুবিধা হয়। ফিফাই স্পষ্টকৈ জনাই দিছে যে প্ৰথমখন খেলত নমাৰ আগতেই জাৰ্ছীত এই দুটা সালসলনি কৰিব লাগিব।
ইয়াৰ পূৰ্বে হাইটিৰ জাৰ্ছীক লৈয়ো একেধৰণৰ বিতৰ্কৰ সৃষ্টি হৈছিল। হাইটিৰ জাৰ্ছীত দেশখনৰ স্বাধীনতা সংগ্ৰামৰ এখন যুদ্ধৰ দৃশ্য অংকন কৰা আছিল। বিশ্বকাপৰ পূৰ্বে দুখন প্ৰস্তুতিমূলক খেলত হাইটিৰ খেলুৱৈসকলে যি জাৰ্ছী পৰিধান কৰিছিল, তাত ওঠৰশ তিনি চনৰ ঐতিহাসিক বাৰ্টিয়াৰৰ যুদ্ধৰ এখন চিত্ৰ আছিল। ফৰাচী ঔপনিৱেশিক বাহিনীৰ বিৰুদ্ধে হোৱা এই যুদ্ধতেই হাইটিয়ে স্বাধীনতা লাভ কৰিছিল। জাৰ্ছীত সেই দৃশ্যৰ লগতে পোলেণ্ডৰ পতাকাও আঁকা আছিল। ফিফাৰ ক্ৰীড়া সামগ্ৰী সম্পৰ্কীয় নিয়ম অনুসৰি কোনো খেলৰ সামগ্ৰীত ৰাজনৈতিক, ধৰ্মীয় বা ব্যক্তিগত বাৰ্তা আৰু শ্লোগান ব্যৱহাৰ কৰাৰ অনুমতি নাই। সেয়েহে হাইটিক সেই পতাকা সলনি কৰিবলৈ কোৱা হৈছিল। এইবাৰ একেই কাৰণত সলনি হ’ল ইজিপ্তৰ জাৰ্ছীও।