‘’ভাল নম্বৰৰ প্ৰলোভনেৰে ছাত্ৰীলৈ প্ৰেমৰ প্ৰস্তাৱ দিয়া’’ৰ বিতৰ্কৰ মাজত সাঙোৰ খাই পৰা মাজুলী সাংস্কৃতিক বিশ্ববিদ্যালয়ৰ নৱ নিযুক্ত উপাচাৰ্য্য ড০ ডম্বৰুধৰ নাথে সোমবাৰে মাজুলীত উপস্থিত হৈ উপাচাৰ্য্যৰ দায়িত্বভাৰ গ্ৰহণ কৰে। বিতৰ্কই ৰাজ্যজুৰি চৰ্চা লাভ কৰি থকাৰ সময়তো ড০ নাথক মাজুলীত উপস্থিত হোৱাৰ লগে লগে জাহাজ ঘাটৰ পৰাই গায়ন-বায়ন, ঢোলে-ডগৰে আদৰি নিয়ে একাংশ লোক তথা দল-সংগঠনৰ প্ৰতিনিধিয়ে।
ছাত্ৰীক যৌন নিৰ্য্যাতনৰ ঘটনাই তোলপাৰ লগাই থকা সময়ত ড০ ডম্বৰুধৰ নাথক এইদৰে বিপুল আদৰণি জনোৱা কাৰ্য্যই প্ৰতিক্ৰিয়াৰ সৃষ্টি কৰিছে। সোমবাৰে মাজুলীত নৱ নিযুক্ত উপাচাৰ্য্য ড০ নাথক আদৰণি জনোৱাৰ পাছতেই মন্তব্য প্ৰকাশ কৰিছে তেওঁৰ বিৰুদ্ধে অভিযোগ অনা ভুক্তভোগী ছাত্ৰীগৰাকীয়ে।
‘’এনেকুৱা এজন মানুহক যে মানুহে সমৰ্থন কৰি ঢোলে-ডগৰে আদৰি নিছে সেয়া আচলতে লাজ আৰু দুখৰ কথা। আমাৰ সমাজত দুই ধৰণৰ মানুহ আছে, কোনোবাই তেওঁক সমৰ্থন কৰিছে, বহুতে মোকো সমৰ্থন কৰিছে,’’-ভুক্তভোগী ছাত্ৰীগৰাকীৰ সংবাদমাধ্যমৰ আগত ভাষ্য।
উল্লেখ্য যে, ২০১৬ চনত ডিব্ৰুগড় বিশ্ববিদ্যালয়ত বুৰঞ্জী বিভাগৰ প্ৰাধ্যাপক হৈ থকাৰ সময়ত ড০ নাথৰ বিৰুদ্ধে ছাত্ৰীগৰাকীয়ে নিৰ্য্যাতন চলোৱাৰ অভিযোগ আনিছিল। বিশ্ববিদ্যালয় কৰ্তৃপক্ষৰ ওচৰত ছাত্ৰীগৰাকীয়ে এই অভিযোগ দাখিল কৰিছিল। কিন্তু বিশ্ববিদ্যালয় কৰ্তৃপক্ষৰ পৰা কোনো সঁহাৰি নাপালে ভুক্তভোগী ছাত্ৰীগৰাকীয়ে।
ইয়াৰ বিপৰীতে অভিযোগ দাখিলৰ ১৫ দিনৰ পাছতেই অধ্যাপক ড০ ডম্বৰুধৰ নাথে ডিব্ৰুগড় বিশ্ববিদ্যালয়ৰ পৰা স্বাস্থ্যজনিত কাৰণ দেখুৱাই স্বেচ্ছাই অৱসৰ গ্ৰহণ কৰিছিল। কিন্তু তেওঁ ইয়াৰ পাছতেই অৰুণাচল প্ৰদেশৰ ৰাজীৱ গান্ধী বিশ্ববিদ্যালয়ত ভিজিটিং প্ৰফেচৰ হিচাপে যোগদান কৰিছিল যদিও এই অভিযোগৰ বাবেই তেওঁক বিশ্ববিদ্যালয় খনে অব্যাহতি দিছিল বুলি জানিব পৰা গৈছে।
কিন্তু ছাত্ৰী গৰাকীৰ অভিযোগ নিষ্পত্তি নহওতেই তেওঁক মাজুলী সাংস্কৃতিক বিশ্ববিদ্যালয়ৰ সন্মানীয় উপাচাৰ্য্য পদত অধিষ্ঠিত কৰাৰ বিষয়টোৱে বিভিন্ন মহলক স্তম্ভিত কৰিছিল। সমান্তৰালভাৱে সাংস্কৃতিক প্ৰাণকেন্দ্ৰ মাজুলীত তেওঁক সোমবাৰে এইদৰে আদৰণি জনোৱা কাৰ্য্যৰো স্বাভাৱিকতে সমানেই প্ৰতিক্ৰিয়া হৈছে।
ইপিনে, মাজুলীত ড০ নাথক আদৰণি জনোৱাৰ দিনটোতে ভুক্তভোগী ছাত্ৰীগৰাকীয়ে ন্যায় বিচাৰি চৰাইদেউৰ উপায়ুক্তৰ জৰিয়তে ৰাজ্যপাললৈ স্মাৰকপত্ৰও প্ৰেৰণ কৰিছে।
