কেন্দ্ৰীয় কেবিনেটৰ সিদ্ধান্তক লৈ অসন্তুষ্ট মেঘালয় চৰকাৰে আজি “কেব”ৰ বিৰোধিতা কৰিবলৈ আনুষ্ঠানিক সিদ্ধান্ত লয়।
আজি হোটেল পাইনউডত চৰকাৰ গঠন কৰি থকা মিত্ৰজোঁট মেঘালয় ডেমক্ৰেটিক এলায়েন্সৰ সমন্বয়ৰক্ষী সমিতিৰ এখন বৈঠক অনুষ্ঠিত হয়।
সংবাদ মাধ্যমৰ আগত বৈঠকৰ বিষয়ে অৱগত কৰি উপ-মুখ্য মন্ত্ৰী প্ৰেছটন টিনছঙে কয় যে বৈঠকখনত কেবৰ বিষয়টো আলোচনা কৰা হয় আৰু ইয়াক মানি নোলোৱাৰ সিদ্ধান্ত লোৱা হয়।
কেন্দ্ৰীয় গৃহ মন্ত্ৰী অমিত শ্বাহৰ সৈতে ৩০ নৱেম্বৰত হোৱা বৈঠকৰ সময়ত ইনাৰলাইন পাৰ্মিট থকা আৰু ষষ্ঠ অনুসূচী থকা অঞ্চলবোৰত কেব প্ৰযোজ্য নহয় বুলি কোৱা হৈছিল।
“যদি বিধেয়কখন ৰাজ্যখনৰ ৯৬ শতাংশ অঞ্চল বাহিৰত ৰাখিব পৰা যায়, তেন্তে গোটেই ৰাজ্যখন কিয় ইয়াৰ প্ৰয়োগৰ বাহিৰত ৰাখিব নোৱাৰিব?”, উপ-মুখ্য মন্ত্ৰীজনে কয়।
তেওঁ জনোৱা মতে, এম ডি এই এতিয়া কেবৰ বিৰোধিতা কৰি কেন্দ্ৰলৈ পত্ৰ লিখিব আৰু সমগ্ৰ ৰাজ্যখনকে বাহিৰত ৰাখিবলৈ আহ্বান জনাব।
এন পি পি নেতৃত্বাধীন মেঘালয় চৰকাৰত য়ুনাইটেড ডেম’ক্ৰেটিক পাৰ্টি (য়ু ডি পি), হিল ষ্টেইট পীপলছ ডেম’ক্ৰেটিক পাৰ্টি (এইচ্ছ এছ পি ডি পি), পীপলছ ডেম’ক্ৰেটিক ফ্ৰণ্ট (পি ডি এফ), বিজেপি আৰু এন চি পি সহযোগী হিচাপে আছে।
উল্লেখ কৰিব পাৰি যে দুদিনমান পূৰ্বে নাগালেণ্ডৰ প্ৰাক্তন মুখ্য মন্ত্ৰী টি আৰ জেলিয়াঙেও মন্তব্য কৰিছিল যে ইনাৰলাইন পাৰ্মিট ব্যৱস্থাই “কেব”ৰ পৰিণতিৰ পৰা নাগালেণ্ডক সুৰক্ষা দিব নোৱাৰে।
