অসমৰ স্বাস্থ্য মন্ত্ৰী হিমন্ত বিশ্ব শৰ্মাই শনিবাৰে কয় যে ডিব্ৰুগড়ত কেৱল কৰ’নাভাইৰাছ আক্ৰান্তৰ চিকিৎসাৰ বাবে অহা দুমাহৰ ভিতৰত এখন ৩০০ খন বিচনাযুক্ত চিকিৎসালয় নিৰ্মাণ কৰা হ’ব।
কৰ’নাভাইৰাছে সৃষ্টি কৰা পৰিৱেশৰ মোকাবিলাৰ বাবে এই চিকিৎসালয়খন জৰুৰীভাৱে নিৰ্মাণ কৰা হ’ব।
“কাইলৈ ভূমি চিনাক্ত কৰা হ’ব। চিকিৎসালয়খনৰ আয়ুস হ’ব পাঁচ বছৰ,” মন্ত্ৰী শৰ্মাই কয়।
ৰাইজ, সাংসদ, মন্ত্ৰী, বিধায়ক সকলোৱে চিকিৎসালয়খনৰ বাবে দান আগবঢ়াইছে বুলি উল্লেখ কৰি মন্ত্ৰী শৰ্মাই সকলোকে দান-বৰঙনি আগবঢ়োৱাৰ বাবে আহ্বান জনায়।
শৰ্মাই লগতে কয় যে অসম চৰকাৰৰ সৈতে ৰাজ্যৰ ২৭খন ব্যক্তিগত নাৰ্ছিং হোমে বুজাবুজিৰ চুক্তি কৰিছে আৰু এইসমূহৰ মালিকপক্ষই সংকটৰ সময়ত সকলো সহায় আগবঢ়োৱাৰ আশ্বাস দিছে।
“ডিব্ৰুগড়ৰ সকলো ব্যক্তিগত নাৰ্ছিং হোমে কাইলৈৰ পৰা কাৰ্ডিঅ’, প্ৰসূতি আৰু কৰ’না ৰোগীক বাদ সকলো ৰোগীৰে চিকিৎসা আগবঢ়াব,” তেওঁ কয়।
এই ৰোগীসকলৰ চিকিৎসাৰ খৰচ চৰকাৰে অটল অমৃত অভিযানৰ অধীনত আগবঢ়াব।
অটল অমৃত অভিযানৰ কাৰ্ড নথকাসকলেও চিকিৎসা গ্ৰহণ কৰিব পাৰিব।
কাৰ্ড নথকা ৰোগীৰ অভিভাৱকে কাইলৈৰ পৰা স্বাস্থ্য বিভাগৰ যুটীয়া সঞ্চালকৰ কাৰ্য্যালয়ৰ পৰা ইয়াক সংগ্ৰহ কৰিব পাৰিব।
আনহাতে ডিব্ৰুগড়ৰ অসম চিকিৎসা মহাবিদ্যালয় আৰু হস্পিটেলে কাৰ্ডিঅ’, প্ৰসূতি, জৰুৰীকালীন আৰু কৰ’না আক্ৰান্ত ৰোগীৰ চিকিৎসা আগবঢ়াব।
