ইংলেণ্ড ক্ৰিকেট দলৰ ষ্টাৰ ক্ৰিকেটাৰ বেন ষ্টোকছে মহামাৰী ক’ৰ’নাত বেয়াকৈ ক্ষতিগ্ৰস্ত হোৱা লোকৰ সহায়ৰ বাবে হাফ মাৰাথনত অংশ ল’ব।
হাফ মাৰাথনৰ জৰিয়তে ক্ৰিকেটাৰ গৰাকীয়ে নেশ্যনেল হেল্থ চাৰ্ভিছ আৰু নেশ্যনেল ক্ৰিকেট চেৰিটিৰ বাবে ফাণ্ড একত্ৰিত কৰাত সহায় কৰিব।
উল্লেখ্য যে বেন ষ্টোকছে প্ৰথমবাৰৰ বাবে হাফ মাৰাথনত অংশ ল’ব। ক্ৰিকেটাৰ গৰাকীৰ ঘৰৰ ওচৰতে আয়োজন কৰা মাৰাথন ৮ কিলোমিটাৰৰ হ’ব বুলি জানিব পৰা গৈছে।
ইংলেণ্ডৰ ২৮ বৰ্ষীয় অলৰাউণ্ডাৰ গৰাকীয়ে কয় যে জীৱনত প্ৰথমবাৰৰ বাবে ৮ কিলোমিটাৰ হাফ মাৰাথনত অংশ লম। তেওঁ ইনষ্টাগ্ৰামৰ জৰিয়তে কয়, ‘হাফ মাৰাথনৰ বিষয়ে ভাবি আছিলো যদিও কেতিয়াও অংশ লোৱা নাছিলো। আমি লকডাউনত আছো, আৰু বাহিৰ ওলোৱাৰ বাবে ইয়াতকৈ ভাল সুবিধা নাপাম। সেয়ে মই বাহিৰ ওলাম আৰু মাৰাথনত অংশ লম’।
ইয়াৰ উপৰি বেন ষ্টোকছে কয় যে হাফ মাৰাথনৰ জৰিয়তে অৰ্থ সংগ্ৰহৰ চেষ্টা কৰিছো, যিয়ে সংকটত পৰা লোকসকলক সকাহ দিব। তদুপৰি হাফ মাৰাথনৰ বাবে তেওঁ কেতিয়াও প্ৰশিক্ষণ লোৱা নাই বুলিও মন্তব্য কৰে।
উল্লেখ্য যে যোৱা বছৰ অনুষ্ঠিত ক্ৰিকেট বিশ্বকাপৰ খিতাপ জয়ী কৰোৱাত ইংলেণ্ডৰ এইগৰাকী অলৰাউণ্ডাৰে মুখ্য ভূমিকা গ্ৰহণ কৰিছিল।
