ক’ৰ’না ভাইৰাছৰ সংক্ৰমণে ক্ৰমাৎ গুৰুতৰ ৰূপ ধাৰণ কৰিবলৈ আৰম্ভ কৰাত দেশৰ আন ঠাইৰ লহতে গুৱাহাটী মহানগৰীতো হাতত ঘঁহা ছেনিটাইজাৰ (Hand Sanitizer)ৰ নাটনি দেখা দিছে।
গুৱাহাটীৰ প্ৰায় বিলাক ফাৰ্মাচিতে এতিয়া হেণ্ড ছেনিটাইজাৰৰ যোগান নাই। ইয়াৰ মাজতে কটন বিশ্ববিদ্যালয়ৰ ৰসায়ন বিজ্ঞান বিভাগে বিশ্ববিদ্যালয়খনৰ ছাত্ৰ-ছাত্ৰী, শিক্ষক-কৰ্মচাৰীৰ ব্যৱহাৰৰ বাবে হেণ্ড ছেনিটাইজাৰ প্ৰস্তুত কৰি উলিয়াইছে।
বিশ্ববিদ্যালয়খনৰ উপাচাৰ্য্য অধ্যাপক ভবেশ চন্দ্ৰ গোস্বামীৰ তৎপৰতাত ৰসায়ন বিজ্ঞান বিভাগে ক’ৰ’না ভাইৰাছৰ সংক্ৰমণৰ প্ৰতিৰোধৰ উদ্দেশ্যে গ্ৰহণ কৰিছে এই ব্যৱস্থা।
উক্ত ছেনিটাইজাৰবিধ প্ৰস্তুত কৰাত ৰসায়ন বিজ্ঞান বিভাগৰ ড0 সঙ্গীতা অগ্ৰৱাল, গৱেষক ছাত্র হীৰেন নাথ, অমল দাস, বিদুৎ দাস আৰু প্ৰণয় শৰ্মাই সহযোগিতা আগবঢ়ায়।
আজি বিশ্ববিদ্যালয়ৰ উপাচাৰ্য্য ভবেশ চন্দ্ৰ গোস্বামীৰ লগতে পঞ্জীয়ক দিগন্ত কুমাৰ দাস, ৰসায়ন বিজ্ঞান বিভাগৰ মুৰব্বী ড0 প্ৰহাস চন্দ্ৰ শৰ্মা, প্ৰকল্প সমন্বয়ক ড0 মনজিৎ কুমাৰ ভট্টাচাৰ্য আদিৰ উপস্থিতিত ছেনিটাইজাৰবিধ উন্মোচন কৰা হয়।
