গুৱাহাটী চিকিৎসা মহাবিদ্যালয় আৰু হস্পিটেলৰ অধীক্ষক ডাঃ ৰমেন তালুকদাৰে ক’ৰনা ভাইৰাছক লৈ জনসাধাৰণক আতংকিত নহ’বলৈ আহ্বান জনাইছে।
“জনসাধাৰণলৈ অনুৰোধ যাতে এইক্ষেত্ৰত ভীতিগ্ৰস্ত নহয়। কৰ’না ৰোগৰ লক্ষণসমূহ দেখিলে চিকিৎসকৰ সহায় লওক,” তালুকদাৰৰ আহ্বান।
তেওঁ লগতে কয় যে বাহিৰৰ পৰা কোনো লোক অহা মানেই কৰ’না আক্রান্ত নহয় আৰু তাক লৈ মিছাতে ভীতিগ্ৰস্ত হ’ব নালাগে।
জি এম চি এইচলৈ শনিবাৰে আমছৈৰ পৰা অনা লোকজনৰ গাত কৰ’নাভাইৰাছৰ বীজাণু নাই বুলি সদৰী কয় তালুকদাৰে কয় যে তেওঁক আজি যাবলৈ দিয়া হৈছে।
তেওঁ কয় যে কৰ’নাভাইৰাছত আক্ৰান্ত হোৱাৰ সন্দেহ কৰাসকলৰ ক্ষেত্ৰত যাৱতীয় সকলো ব্যৱস্থা গ্ৰহণ কৰা হৈছে আৰু নমুনা পৰীক্ষা কৰা হৈছে।
“এতিয়ালৈ ২৯টা নমুনা সংগ্ৰহ কৰা হৈছিল৷ তাৰে ৭টা জি এম চি এইচৰ আৰু বাকীখিনি বাহিৰৰ ৰাজ্যসমূহৰ,” তেওঁ জনায়৷
তেওঁ লগতে জনাই যে কৰ’নাভাইৰাছ সম্পৰ্কীয় নমুনা জি এম চি এইচৰ লগতে ডিব্ৰুগড়, শিলচৰ আৰু যোৰহাটৰ চিকিৎসা মহাবিদ্যালয়ত পৰীক্ষা কৰাৰ ব্যৱস্থা কৰা হৈছে৷
উক্ত আটাইকেইখন চিকিৎসালয়তে কৰ’নাভাইৰাছত আক্ৰান্ত ৰোগীৰ বাবে আছুতীয়া কক্ষৰ ব্যৱস্থা কৰা হৈছে।
কৰ’নাভাইৰাছৰ বিৰুদ্ধে সুৰক্ষামূলক ব্যৱস্থাৰ অংশৰূপে অসম চৰকাৰে দেওবাৰৰ পৰা ২৯ মাৰ্চলৈকে অসমৰ সকলো শিক্ষানুষ্ঠান, ছবিগৃহ, জীম, ছুইমিং পুল বন্ধ কৰাৰ নিৰ্দেশ দিছে।
সকলো চৰকাৰী কাৰ্য্যসূচী বন্ধ কৰিবলৈ দিয়া হৈছে লগতে আয়োজিত হ’বলগীয়া আন ৰাজহুৱা অনুষ্ঠানো বাতিল কৰিবলৈ নিৰ্দেশ দিয়া হৈছে।
অসমত বৰ্তমানলৈকে কোনো লোক কৰ’নাভাইৰাছত আক্ৰান্ত হোৱাৰ খবৰ অহা নাই।
বৰ্তমানলৈকে ভাৰতত ১০৭জন লোক ক’ৰ’না ভাইৰাছত আক্রান্ত হৈছে, ইয়াৰে ১৭জন বিদেশী পৰ্যটক। ভাৰতত এই ভাইৰাছৰ ফলত দুজন লোকৰ মৃত্যু হৈছে।
বিশ্বৰ ১৪৯খন দেশৰ ১.৫ লাখ লোক ক’ৰ’নাত আক্রান্ত হৈছে আৰু ৫৬০৪জন লোকৰ মৃত্যু হৈছে।
