লকডাউনৰ বাবে সমস্যাৰ সন্মুখীন হোৱা পৰিয়ালক সহায় আগবঢ়াব ভাৰতৰ অন্যতম সফল অফ স্পিনাৰ হৰভজন সিং আৰু তেওঁৰ পত্নী গীতা বছৰাই।
হৰভজনে জানিবলৈ দি কয় যে তেওঁ আৰু তেওঁৰ পত্নী গীতাই জলন্ধৰৰ ৫০০০ এনে পৰিয়ালক খাদ্য সামগ্ৰী প্ৰদান কৰিব।
বিশ্বব্যাপী আতংকৰ সৃষ্টি কৰা ক’ৰ’না ভাইৰাছৰ ফলত ভাৰতত এই পৰ্যন্ত ১০০ জনৰো অধিক লোকে প্ৰাণ হেৰুৱাইছে।
হৰভজন সিঙে দেওবাৰে নিজৰ টুইটাৰত ফটো শ্বেয়াৰ কৰি এই কথা ৰাজহুৱা কৰে। হৰভজনে লিখে যে গীতা বছৰা আৰু মই আজিৰ পৰা ৫০০০ পৰিয়ালক খাদ্য সামগ্ৰী প্ৰদান কৰাৰ সংকল্প লৈছো।
হৰভজন সিঙে আৰু কয়, ‘আমি আমাৰ সতীৰ্থসকলৰ বোজা কিছু কম কৰাৰ চেষ্টা কৰিম। সুৰক্ষিত থাকক, ঘৰত থাকক, ভগৱানে কৃপা কৰক। জয় হিন্দ’।
Satnam waheguru.. bas Himmat hosla dena ?? @Geeta_Basra and I pledge to distribute ration to 5000 families from today ?? May waheguru bless us all pic.twitter.com/s8PDS9yet1
— Harbhajan Turbanator (@harbhajan_singh) April 5, 2020
ক্ৰিকেটাৰ গৰাকীৰ পত্নীয়েও এই টুইটতো শ্বেয়াৰ কৰে।
৩৯ বছৰীয়া হৰভজনে কয় যে পৰিস্থিতি স্বাভাৱিক অৱস্থালৈ ঘূৰি নহালৈকে কৰ্মহীন হৈ পৰা আৰু অঘৰী লোকসকলকহে আমি খাদ্য সামগ্ৰী প্ৰদান কৰিম।
তেওঁ কয়, ‘আমি ৫ কেজি চাউল, আটা, তেলৰ লগতে অন্যান্য আৱশ্যকীয় সামগ্ৰী প্ৰদান কৰি আছো’।
ভজ্জীয়ে লগতে কয়, ‘মই এতিয়াও জলন্ধৰৰ লগত আছো। মোৰ নিজৰ লোকসকলক এইদৰে ভুগি থকা দেখিব নোৱৰো। ক্ৰিকেটে মোক বহুত দিছে সেয়ে মই এইখিনি কৰিব পাৰিছো’।
