দেশত ক’ৰ’ণাৰ ছবি খন পুনৰ ভয়াৱহ হৈ পৰিছে।প্ৰায় চাৰি মাহৰ পিছত দেশত এতিয়া প্ৰতিদিনে ক’ৰ’ণাত আক্ৰান্ত লোকৰ সংখ্যা ৫০ হাজাৰৰ ওচৰা-ওচৰি হ’বলৈ ধৰিছে।
দেশৰ ১৮ খন ৰাজ্যত এতিয়া পোৱা গৈছে কোভিডৰ নতুন প্ৰজাতি।
এই প্ৰজাতি কোভিড-১৯ তকৈয়ো অধিক মাৰাত্মক বুলি বিজ্ঞানীসকলে প্ৰকাশ কৰিছে।
ভেকচিন ওলাইছে, কিন্তু কোভিডৰ আতংকৰ পৰা মুক্ত হ’ব পৰা নাই দেশ।
দেশত কিছুদিন আগলৈকে কোভিডৰ সংহাৰ বহু পৰিমাণে নিয়ন্ত্ৰণলৈ আহিছিল যদিও শেহতীয়াকৈ পুনৰ কোভিডে মাৰাত্মক ৰূপত মূৰ দাঙি উঠিছে।
বিশ্বৰ অন্যান্য প্ৰান্তৰ লগতে ভাৰততো বৰ্তমান সময়ত কোভিড ভাইৰাছৰ সংক্ৰমণ পুনৰ নতুনকৈ আৰম্ভ হৈছে।
বিগত ২৪ ঘণ্টাত ভাৰতত ৪৭,২৬২ গৰাকী ব্যক্তি কোভিড প’জিটিভ হৈছে।
ভাৰত চৰকাৰৰ স্বাস্থ্য আৰু পৰিয়াল কল্যাণ মন্ত্ৰ্যালয়ে শেহতীয়াভাৱে প্ৰকাশ কৰা তথ্য অনুসৰি ভাৰতত বৰ্তমানলৈ জন।১কোটি ১৭ লাখ ৩৪ হাজাৰ ৫৮ গৰাকী ব্যক্তি কোভিড প’জিটিভ হৈছে।
আনহাতে, ভাৰতৰ বিভিন্ন ৰাজ্যত বিগত ২৪ ঘণ্টাত ২৭৫ গৰাকী কোভিড আক্ৰান্তৰ মৃত্যু হৈছে।
ভাৰতত বৰ্তমানলৈ কোভিডৰ সংক্ৰমণৰ ফলত ১ লাখ ৬০ হাজাৰ ৪৪১ গৰাকী কোভিড আক্ৰান্তই প্ৰাণ হেৰুৱাইছে।
শেহতীয়াকৈ মহাৰাষ্ট্ৰ, তামিলনাডু, পঞ্জাৱ আদি ৰাজ্যত কোভিডে ভয়ংকৰ ৰূপ ধাৰণ কৰিছে।
মহাৰাষ্ট্ৰৰ কেইবাখনো জিলাত সম্পূৰ্ণ লকডাউন ঘোষণা কৰা হৈছে। পঞ্জাৱৰো বিভিন্ন প্ৰান্তত লকডাউন ঘোষণা কৰা হৈছে।
