শূন্য সহনশীলতাৰ কথা কোৱা বিজেপি চৰকাৰৰ দিনতে গোৱালপাৰা জিলাৰ গড়কাপ্তানী বিভাগৰ এজন কনিষ্ঠ অভিযন্তাই প্ৰধান মন্ত্ৰী গ্ৰাম চড়ক যোজনা আঁচনি ৰূপায়নৰ নামত দুৰ্নীতিৰ পোহাৰ মেলাৰ কিছু তথ্য পোহৰলৈ আহিছে।
অভিযোগ অনুসৰি জিলাখনৰ গড়কাপ্তানী বিভাগৰ দুধনৈ উপ সংমণ্ডলৰ (পথ) কনিষ্ঠ অভিযন্তা গোলাপ কলিতাই বিগত কুৰি বছৰৰো অধিক কাল একে স্থানতে চাকৰি কৰি পথ নিৰ্মাণৰ নামত ভয়ংকৰ দুৰ্নীতি সংঘটিত কৰিছে।
শেহতীয়াকৈ বালিজনা উন্নয়ন খণ্ডৰ অন্তৰ্গত বৰভেটাত এটা বিশ লাখ টকাৰ কালভাৰ্টৰ নিৰ্মাণ দুৰ্নীতি কথা ফাদিল হোৱাৰ পিছতে পোহৰলৈ আহিছে আন কেতবোৰ ভয়ংকৰ তথ্য৷ জানিব পৰা মতে কনিষ্ঠ অভিযন্তা গোলাপ কলিতাই প্ৰধান মন্ত্ৰী গ্ৰাম চড়ক যোজনাৰ অধিনৰ পথ নিৰ্মাণৰ বাবে পথৰ নাম বাচনি কৰি অহাৰ নামতো বিভিন্ন গ্ৰাম্যাঞ্চলৰ লোকৰ পৰা সংগ্ৰহ কৰিছে বৃহৎ পৰিমানৰ ধন।
অভিযোগ অনুসৰি জিলাখনৰ অসম-মেঘালয় সীমান্তৱৰ্তী থান্তিপাৰা গাঁৱত পথ পকীকৰণৰ নামত সংগ্ৰহ কৰিছিল ধন। ধন আদায় দিয়াৰ পিছতো পথ পকীকৰণ নোহোৱাত অভিযন্তা গোলাপ কলিতাক ৰাইজে হেচা প্ৰয়োগ কৰিলে হ’ব হ’ব বুলি কৈ থৈ দিয়ে।
বহু বছৰ উপেক্ষা কৰাত থান্তিপাৰাৰ ৰাইজে জিলাখনৰ গড়কাপ্তানী বিভাগৰ উচ্চ পদস্থ বিষয়াক অৱগত কৰি গোচৰ দিয়ে আৰু বিভাগটোৰ উচ্চ পদস্থ বিষয়াৰ হেচাত কনিষ্ঠ অভিযন্তা গোলাপ কলিতাই একে দিনাই ৰাইজক উৎকোচৰ ধন ঘূৰাই দিবলৈ বাধ্য হয়।
বিভিন্ন সময়ত এই বিষয়া গৰাকীৰ বিৰুদ্ধে বহু অভিযোগ উত্থাপন হৈছে যদিও বিভাগটোৰ লগতে চৰকাৰ-প্ৰশাসনে কোনো ব্যৱস্থা গ্ৰহন নকৰা বিষয়টোৱে সন্দেহৰ অৱতাৰণা কৰিছে।
ইফালে দুদিন পূৰ্বে গোলাপ কলিতাৰ লুণ্ঠনৰ বাতৰি নৰ্থ-ইষ্ট নাওত সবিস্তাৰে প্ৰকাশ পোৱাৰ পিছতে প্ৰতাপি কনিষ্ঠ অভিযন্তা গোলাপ কলিতাই ফোন যোগে সাংবাদিকক ধমকি প্ৰদান কৰে।
আন এক সূত্ৰৰ পৰা জানিব পৰা মতে বিগত বিধানসভা নিৰ্বাচনত বিষয়া গৰাকীক ধুবুৰীলৈ বদলি কৰা হৈছিল যদিও বিভাগক মেনেজ কৰি দুধনৈ উপ সংমণ্ডলতে থাকি যায়। দৰমহা ধুবুৰীত আৰু কাম দুধনৈত। বিষয়া গৰাকীৰ কাম জিলা সংমণ্ডলৰ কাৰ্যালয়ত কিন্ত থাকে দুধনৈ উপ সংমণ্ডলত।
ইফালে কেইবাটাও প্ৰধান মন্ত্ৰী গ্ৰাম চড়ক যোজনা কামৰ দায়িত্বত থকা অভিযন্তা গোলাপ কলিতাই ঠিকাদাৰৰ পৰা ধন নাপালে কাম নকৰে বুলি কেইবাজনো ঠিকাদাৰে মৌখিকভাৱে অভিযোগ কৰিছে। কাম সম্পূৰ্ণ হোৱাৰ পিছতো একমাত্ৰ কনিষ্ঠ অভিযন্তা গোলাপ কলিতাৰ হেমাহিৰ বাবেই দুজনমান ঠিকাদৰে এতিয়াও বিল পাবলৈ সক্ষম হোৱা নাই।
এতিয়া প্ৰশ্ন হয় ৰাজ্যত এগৰাকী শক্তিশালী মন্ত্ৰী এই বিভাগটোৰ দায়িত্বত থকাৰ পিছতো গোলাপ কলিতাৰ দৰে এজন কনিষ্ঠ অভিযন্তাক নিয়ন্ত্ৰণ কৰিব নোৱাৰা বিষয়টোৱে ৰাইজৰ চিন্তা বৃদ্ধি কৰিছে। ইফালে অতি কম সময়ৰ ভিতৰত গোৱালপাৰাৰ এক অনুষ্ঠানত অংশ গ্ৰহনৰ বাবে আহিব লগা মন্ত্ৰী হিমন্ত বিশ্ব শৰ্মাক জিলাখনৰ একাংশ ৰাইজে বিষয়া গৰাকীৰ বিৰুদ্ধে বিহিত ব্যৱস্থা গ্ৰহনৰ দাবী জনাব।
