অ’টিটি প্লেটফৰ্ম নেটফ্লিক্সত সদ্যমুক্তিপ্ৰাপ্ত ৱেব ছিৰিজ ‘খাকী: দ্য বিহাৰ চেপ্টাৰ’ৰ জৰিয়তে লাইমলাইটলৈ অহা বিহাৰৰ আই পি এছ বিষয়া অমিত লোধাৰ বিৰুদ্ধে উঠিছে দুৰ্নীতিৰ অভিযোগ। বিহাৰ আৰক্ষীৰ বিশেষ নিৰীক্ষণ ইউনিটে লোডাৰ বিৰুদ্ধে দুৰ্নীতিৰ অভিযোগত এফ.আই.আৰ) দাখিল কৰিছে।
লোধাৰ বিৰুদ্ধে দুৰ্নীতি প্ৰতিৰোধ আইন আৰু ভাৰতীয় দণ্ডবিধিৰ অপৰাধমূলক ষড়যন্ত্ৰৰ সৈতে জড়িত ১২০ (বি) ধাৰা আৰু ১৬৮ ধাৰাৰ অধীনত এফ.আই.আৰ দাখিল কৰা হৈছে।
উল্লেখ্য যে লোধাৰ গ্ৰন্থ “বিহাৰ ডায়েৰীজ”ৰ আধাৰত নেটফ্লিক্সৰ ৱেব ছিৰিজ ‘খাকী: দ্য বিহাৰচেপ্টাৰ’ৰ নিৰ্মাণ কৰা হৈছিল। আৰক্ষীৰ এফ.আই.আৰ- ত ৱেব ছিৰিজৰ বাবে লোধাই ক’লা ধন ব্যৱহাৰ কৰিছিল বুলি অভিযোগ কৰা হৈছে।
এফ.আই.আৰ- ত লগতে অভিযোগ কৰা হৈছে যে লোধাক গ্ৰন্থ লিখি বা প্ৰকাশ কৰি ব্যৱসায়িক কামত ব্যৱহাৰ কৰিবলৈ কৰ্তৃত্ব দিয়া হোৱা নাছিল।
অভিযোগ মতে “চৰকাৰী কৰ্মচাৰী হোৱাৰ পিছতো তেতিয়াৰ মগধ ৰেঞ্জৰ মহাপৰিদৰ্শক অমিত লোধাই নেটফ্লিক্স আৰু খাকী ৱেব ছিৰিজ নিৰ্মাণ কৰা কোম্পানী ফ্ৰাইডে ষ্ট’ৰী টেলাৰ প্ৰাইভেট লিমিটেডৰ সৈতে অবৈধভাৱে ব্যক্তিগত/বাণিজ্যিক কাৰ্য্যকলাপত লিপ্ত হৈছিল।”
ইয়াত লগতে কোৱা হৈছে যে এনে কাৰ্যকলাপৰ প্ৰতি লক্ষ্য ৰাখি তদন্তকাৰী সংস্থাসমূহে প্ৰস্তুত কৰা তদন্তৰ প্ৰতিবেদন আৰক্ষীয়ে পৰ্যালোচনা কৰিছিল আৰু ব্যৱস্থা গ্ৰহণ কৰা হৈছিল।
অবৈধভাৱে উপাৰ্জন কৰিবলৈ আৰু ক’লা ধনক বৈধ ধনলৈ ৰূপান্তৰিত কৰিবলৈ লোধাই অবৈধ কাৰ্যকলাপৰ আশ্ৰয় লৈ ৱেব ছিৰিজ ‘খাকী: দ্য বিহাৰ চেপ্টাৰ’ৰ প্ৰযোজনাৰ বাবে তেওঁৰ দ্বাৰা লিখিত গ্ৰন্থ ‘বিহাৰ ডায়েৰীজ’ ব্যৱহাৰ কৰিছিল বুলি অভিযোগত উল্লেখ কৰা হৈছে।
বিহাৰৰ শ্বেখপুৰা জিলাত সন্ত্ৰাসৰ সৃষ্টি কৰা এক ভয়ংকৰ গেংষ্টাৰক এগৰাকী আৰক্ষী বিষয়াই কেনেকৈ গ্ৰেপ্তাৰ কৰিবলৈ সক্ষম হয়, তাৰ কাহিনী ‘খাকী: দ্য বিহাৰ চেপ্টাৰ’ত দেখুওৱা হৈছে।
