বিশ্ববিদ্যালয়-মহাবিদ্যালয়ৰ ছাত্ৰ একতা সভাৰ নিৰ্বাচনসমূহতো দেশৰ সংসদীয় নিৰ্বাচনৰ ছাঁ দেখা পোৱা যায়। ফলত ছাত্ৰ নিৰ্বাচনতো দেখা যায়, নৃত্য-গীত, ভোজ-ভাত আদিৰ ব্যয়বহুল প্ৰচাৰ কাৰ্যসূচী। এই নিৰ্বাচনসমূহতো বহু ৰাজনৈতিক দল, ছাত্ৰ সংগঠন আদিক উবুৰি খাই পৰা দেখা যায়। কিন্তু এনে ব্যয়বহুলতাৰ বিপৰীতে ব্যতিক্ৰমী প্ৰচাৰ চলোৱা দেখা গৈছে কটন বিশ্ববিদ্যালয় ছাত্ৰ একতা সভাৰ নিৰ্বাচনৰ দুজন প্ৰাৰ্থীক।
৬ অক্টোবৰত অনুষ্ঠিত হ’ব লগীয়া ছাত্ৰ একতা সভা, ২০১৮-১৯ৰ নিৰ্বাচনত সভাপতি আৰু উপসভাপতি পদত নিৰ্দলীয় প্ৰাৰ্থী হিচাপে প্ৰতিদ্বন্দ্বিতা আগ বঢ়াইছে ক্ৰমে ব্ৰজেন ফুকন আৰু সঞ্জয় ডেকাই।
বিশ্ববিদ্যালয়খনৰ চহিদ মোজাম্মিল হক ছাত্ৰাবাসৰ সমৰ্থনত প্ৰতিদ্বন্দ্বিতা কৰা এই ছাত্ৰ দুজনক বৰ্তমান সময়ত ছাত্ৰ একতা সভাৰ নিৰ্বাচনত সততে দেখিবলৈ পোৱা ব্যয়বহুলতাক নিজৰ প্ৰচাৰ অভিযানৰ মাজেৰে বিৰোধিতা কৰা দেখা গৈছে।
প্ৰচাৰৰ বাবে তেওঁলোকে একাংশ সমৰ্থকৰ সহায়ত কিছু কাৰ্টুন অংকন কৰি, বাটৰ নাট আয়োজন কৰি আৰু য়ু টিউবত গীত-মাত প্ৰচাৰ কৰি প্ৰচলিত ব্যৱস্থাসমূহৰ বিৰোধিতা কৰিছে।
এই ব্যতিক্ৰমী প্ৰচাৰ সন্দৰ্ভত সভাপতি পদৰ প্ৰাৰ্থী ব্ৰজেন ফুকনে কয়, “বিশ্ববিদ্যালয়-মহাবিদ্যালয়ৰ নিৰ্বাচনৰ নামত ভোজ-ভাত খুওৱা, প্ৰচাৰ অভিযানৰ নামত লাখৰ ঘৰত টকা খৰচ কৰাৰ যি পৰম্পৰা দেখা যায় তাৰ দ্বাৰা গণতন্ত্ৰক হত্যা কৰি থকা হৈছে। কটন বিশ্ববিদ্যালয়ৰ প্ৰতিগৰাকী ছাত্ৰ-ছাত্ৰী বিবেকৱান। গতিকে এনেদৰে প্ৰলোভন দিয়া প্ৰক্ৰিয়াটোৰ আমি বিপৰিতে থিয় দিছো।”
ইপিনে, উপসভাপতি পদৰ প্ৰাৰ্থী সঞ্জয় ডেকাই জানিবলৈ দিয়ে যে তেওঁলোকে কোনো ৰাজনৈতিক দল বা ছাত্ৰ সংগঠনৰ সহায় নলয়।
“বিশ্ববিদ্যালয় এখনৰ ছাত্ৰ-ছাত্ৰীসকলৰ মাজৰ এক নিৰ্বাচনত ৰাজনৈতিক দল আৰু ছাত্ৰ সংগঠনসমূহক পিছত ৰাখি অৱতীৰ্ণ হোৱাৰ প্ৰয়োজন আমি অনুভৱ নকৰো।” সঞ্জয় ডেকাই কয়।
উল্লেখ্য যে কটন বিশ্ববিদ্যালয় ছাত্ৰ একতা সভাৰ এইবাৰৰ নিৰ্বাচনত ১৮টা পদৰ বিপৰীতে মুঠ ৫১জনে প্ৰতিদ্বন্দিতা কৰিছে। ইয়াৰে দুটা পদৰ বিপৰীতে দুজন প্ৰাৰ্থী ইতিমধ্যে বিনা প্ৰতিদ্বন্দ্বিতাৰে নিৰ্বাচিত হৈছে।