নাগৰিকত্ব সংশোধনী বিধেয়কক লৈ কৌশলী স্থিতি লৈ অহা অগপ নেতৃত্বৰ বিৰুদ্ধে ক্ষুব্ধ হোৱা একাংশ কটনিয়ানে আজি আমবাৰীস্থিত অগপৰ মুখ্য কাৰ্যালয় ঘেৰা কৰে।
কটন বিশ্ববিদ্যালয়ত অধ্যয়নৰত প্ৰায় ৩০জন ছাত্ৰৰ এটা দল আজি দুপৰীয়া হঠাতে আঞ্চলিক দলটোৰ কাৰ্য্যালয়ৰ সন্মুখত উপস্থিত হয় আৰু সভাপতি অতুল বৰা, কাৰ্য্যকৰী সভাপতি কেশৱ মহন্ত আৰু মন্ত্ৰী ফণীভূষণ চৌধুৰীৰ প্ৰতিমূৰ্তি দাহ কৰি প্ৰতিবাদ সাব্যস্ত কৰে।
প্ৰতিবাদত অংশগ্ৰহণ কৰি কটন বিশ্ববিদ্যালয়ৰ ছাত্ৰ একতা সভাৰ প্ৰাক্তন সাধাৰণ সম্পাদক জিণ্টু ঠাকুৰীয়াই অগপ নেতৃত্বক কটাক্ষ কৰি কয়, “আপোনালোকে গাদী ৰক্ষা কৰিবলৈ এনেদৰে কূটকৌশল আৰু নাটক ৰচনা কৰিব নালাগে। আপোনালোকে চৰকাৰৰ সংগ ত্যাগ কৰি ওলাই আহক। আপোনালোকে আগতে ভুল কৰিছে, ৰাইজে শিক্ষা দি থৈছে, এইবাৰ এনে ভুল কৰিলে অগপক পুলিয়ে-পোখাই উভালি পেলাব।”
অগপৰ স্থিতিক চহিদৰ প্ৰতি অপমান বুলি মন্তব্য কৰি তেওঁ আৰু কয়, “অগপ নেতৃত্বই অসম আন্দোলনৰ ৮৫৫জন চহিদক অপমান কৰিছে, গতিকে তেওঁলোকক অসমৰ ৰাইজক ক্ষমা নকৰে।”
প্ৰতিবাদৰ কথা জানিব পাৰি আৰক্ষী প্ৰতিবাদস্থলীলৈ আহে আৰু প্ৰতিবাদকাৰীসকলক বাধা দিবলৈ চেষ্টা কৰে। ফলত আৰক্ষীৰ সৈতে প্ৰতিবাদকাৰী ছাত্ৰসকলৰ হতা-হতিৰ সৃষ্টি হয়।
পিছত প্ৰতিবাদস্থলীৰ পৰা আৰক্ষীয়ে প্ৰতিবাদকাৰী ছাত্ৰসকলক চোঁচৰাই লৈ যোৱা দেখা যায়। তেওঁলোকক গ্ৰেপ্তাৰ কৰি লতাশিল থানালৈ নিয়ে।
প্ৰতিবাদকাৰী ছাত্ৰসকলৰ মাজত কটন বিশ্ববিদ্যালয়ৰ ছাত্ৰ একতা সভাৰ প্ৰাক্তন সাধাৰণ সম্পাদক প্ৰাঞ্জল কলিতা, জিণ্টু ঠাকুৰীয়া, হীৰকজ্যোতি বৰাকে ধৰি প্ৰায় ৩০জন ছাত্ৰ আছিল।
বিধেয়কখনক লৈ অগপৰ নেতৃত্বৰ তালি-ভুলিত অতিষ্ঠ হৈ পূৰ্বেও কিছু সংখ্যক মহিলাই দলটোৰ কাৰ্য্যালয় ঘেৰাও কৰিছিল।
ইয়াৰোপৰি একেটা কাৰণতে এজন অগপ কৰ্মীয়ে দলটোৰ মুখ্য কাৰ্য্যালয়ত তলা লগোৱাৰ দৰে ঘটনাও ঘটিছিল।