চৌদিশে ড্ৰাগছ আদি নিচা জাতীয় পদাৰ্থৰ বিৰুদ্ধে অভিযান চলি থকা সময়তে ধুবুৰী জিলাৰ চাপৰ থানাৰ অন্তৰ্গত বহলপুৰত ১৭ নম্বৰ ৰাষ্ট্ৰীয় ঘাইপথত অভিযান চলাই চাপৰ আৰক্ষীয়ে এক বৃহৎ সফলতা লাভ কৰিছে।
এক গোপন সূত্ৰৰ পমখেদি চাপৰ থানাৰ ভাৰপ্ৰাপ্ত আৰক্ষী বিষয়া প্ৰণৱ দলেৰ নেতৃত্বত চলোৱা এই অভিযানত ৭৯২০ বটল ” NEW PHENSEDYL” নামৰ কফ ছিৰাপ জব্দ কৰা হৈছে।
পশ্চিমবঙ্গৰ ফলাকাটাৰ পৰা এছ ০১, এম্ চি ৯৩৯৮ নম্বৰৰ এখন ট্ৰাকত মুঠ ৭১ টা কৈ ডাঠ প্লাষ্টিকৰ কাৰ্টুনত অতি কৌশলপূৰ্ণ ভাবে আমৰ সৈতে এই কফ ছিৰাপৰ বটল সমূহ অনা হৈছিল।
জানিব পৰা মতে পশ্চিমবঙ্গৰ ফালাকাটাৰ পৰা অসমৰ মাজেদি ত্ৰিপুৰাৰ আগৰতলা চহৰলৈ এই কফ চিৰাপ সমূহ কঢ়িয়াই নিব বিচৰা হৈছিল।। এই সংক্ৰান্তত উক্ত মালবাহী গাড়ীখনৰ চালক ছাইফুল ইছলাম (২৭) ক আৰক্ষীয়ে আটক কৰি তদন্ত চলাই আছে।
জানিব পৰা মতে ধৃত চালক গৰাকী চাপৰ চহৰৰ নিচেই কাষত থকা বঙাইগাঁও জিলাৰ যোগীঘোপা থানাৰ অন্তৰ্গত পশ্চিম মাজেৰআলগা গাওঁ পঞ্চায়তৰ ঝাউকুৰা গাওঁৰ বাসিন্দা হাবিজুৰ ৰহমানৰ পুত্ৰ। আমৰ সৈতে কফ ছিৰাপ বোজাই ট্ৰাক খন বহলপুৰৰ পৰা কৰায়ত্ব কৰি চাপৰ থানালৈ অনাৰ পিছত চাপৰৰ চক্ৰ বিষযা শান্তনু গগৈ , বিলাসীপাৰা মহকুমা আৰক্ষী বিষয়া বিৰিঞ্চি বৰা , চক্ৰআৰক্ষী পৰিদৰ্শক প্ৰফুল্ল কুমাৰ দাস আৰু উপস্থিত একাংশ ৰাইজৰ সন্মুখত উক্ত গাড়ী খন খোলা হয় বুলি ভাৰপ্ৰাপ্ত আৰক্ষী বিষয়া প্ৰণৱ দলেই জানিবলৈ দিছে।
আমৰ সৈতে কফ ছিৰাপ ধৰা পৰাৰ বাবে ৰাইজে সন্দেহ কৰিবলৈ বাধ্য হৈছে যে এনে ধৰণে কৌশল অৱলম্বন কৰি বিভিন্ন সামগ্ৰীৰ সৈতে মাৰাত্মক ড্ৰাগছ , হিৰইন আদি নিচা জাতীয় দ্ৰৱ্য ট্ৰাক আদি বাহনৰ জৰিয়তে পুলিচ- প্ৰশাসনৰ চকুত ধূলি দি সৰবৰাহকাৰী সকলে সৰবৰাহ কৰি থাকিব পাৰে ।
এই ক্ষেত্ৰত প্ৰশাসন আৰু অধিক সজাগ থাকিব লাগিব বুলি বহুতে মতপোষণ কৰিছে।
এনে ধৰণৰ মাৰাত্মক নিচা জাতীয় দ্ৰৱ্য প্ৰচল ৰোধ কৰাৰ ক্ষেত্ৰত অঞ্চল ভেদে ৰাইজ , সামাজিক আদি সংগঠনে কিছু ক্ষেত্ৰত আগবাঢি আহিব লাগিব।
চাপৰৰ বহলপুৰত কৰায়ত্ব কৰা এই কফ ছিৰাপ সমূহৰ মুঠ প্ৰায় ১১৮৮০০ টকা হ’ব বুলি ধাৰণা কৰা হৈছে। কফ ছিৰাপৰ প্ৰতিটো বটলত ১৪০ টকা এম আৰ পি লিখা আছে। কিন্তু ইয়াৰ অবৈধ কাৰবাৰ কৰা সকলে একো একোটা বটলৰ তিনিৰ পৰা পাঁচশ টকাত বিক্ৰী কৰে বুলি বিশেষ সূত্ৰে প্ৰকাশ।
চাপৰ আৰক্ষীৰ এই অভিযানক ৰাইজে প্ৰশংসা কৰিছে।অসমৰ চৌদিশে অসম আৰক্ষী ড্ৰাগছ আদি নিচা জাতীয় টেবলেট,কফ ছিৰাপ ,গাঞ্জা , হিৰইন তথা অন্যান্য বৰবিহ সদৃশ এই দ্ৰৱ্যৰ বিৰুদ্ধে থিয় দি কঠোৰ হাতেৰে দমন কৰাৰ যি পদক্ষেপ গ্ৰহণ কৰিছে সেয়া শলাগ লবলগীয়া ।
ৰাজ্যবাসীয়ে মুখ্যমন্ত্ৰী হিমন্ত বিশ্ব শৰ্মা নেতৃতাধীন অসম চৰকাৰ লগতে আৰক্ষী বিভাগক এই ক্ষেত্ৰত ধন্যবাদ জ্ঞাপন কৰিছে।
