যোৱা ২১ অক্টোবৰত অনুষ্ঠিত হৈ যোৱা অসমৰ চাৰিটা বিধানসভা সমষ্টিৰ উপ নিৰ্বাচনৰ ভোটগণনা অনুষ্ঠিত হ’ব। ৰাতিপুৱা ৮ বজাৰ পৰা ভোটগণনা কেন্দ্ৰসমূহত চাৰিওটা বিধান সভা সমষ্টিৰ বাবে ভোটগণনা আৰম্ভ হৈছে।
বহু অপেক্ষাৰত বিধান সভা সমষ্টি কেইটাৰ ফলাফল দুপৰীয়া ২ বজাৰ ভিতৰত লাভ কৰিব বুলি অনুমান কৰা হৈছে।
উপ নিৰ্বাচন অনুষ্ঠিত হোৱা বিধানসভা সমষ্টি কেইটা হৈছে ৰাতাবাৰী, ৰঙাপাৰা, সোণাৰী আৰু জনীয়া। ইয়াৰে ৰাতাবাৰী, সোণাৰি আৰু ৰঙাপাৰ বিজেপিৰ দখলত আৰু জনীয়া সমষ্টি কংগ্ৰেছৰ দখলত আছিল।
উল্লেখযোগ্য যে যোৱা লোকসভা নিৰ্বাচনত ৰঙাপাৰাৰ পৰা বিধায়ক পল্লৱলোচন দাস, সোণাৰীৰ পৰা তপন গগৈ, জনীয়াৰ পৰা আব্দুল খালেক আৰু ৰাতাবাৰীৰ পৰা কৃপানাথ মাল্লা লোকসভালৈ নিৰ্বাচিত হোৱাৰ পাছৰে পৰা আসনকেইখন খালী হৈ আছিল।
ইফালে চাৰিখন জিলাত অনুষ্ঠিত হ’ব লগা ভোট গণনাৰ বাবে প্ৰতিখন জিলা প্ৰশাসনে নিৰাপত্তা ব্যৱস্থা কটকটীয়া কৰি তুলিছে যাতে শান্তি-শৃংখলা বিঘ্নিত হ’ব পৰা কোনোধৰণৰ ঘটনা সংঘটিত নহয়।
