বিশ্বত সংহাৰৰ সৃষ্টি কৰা কোভিড প্ৰতিৰোধৰ বাবে ভাৰতে প্ৰস্তুত কৰা কোভাক্সিন ভেকচিনৰ নাম নাই বিশ্ব স্বাস্থ্যসংস্থাৰ ভেকচিনৰ তালিকাত।
ভাৰত বায়’টেকে প্ৰস্তুত কৰা কোভাক্সিন ভেকচিনৰ ৫ কোটি ৮০ লাখ ডজ বিদেশলৈও ৰপ্তানি কৰা হৈছে। অৰ্থাৎ ভাৰতৰ লগতে ব্ৰাজিল, বাংলাদেশ আদিৰ লগতে আন বহু দেশৰ লোকে এতিয়া কোভাক্সিন ভেকচিন গ্ৰহণ কৰিছে।
ইমানৰ পিছতো ভাৰতে প্ৰস্তত কৰা ভেকচিন বিধৰ নাম বিশ্ব স্বাস্থ্য সংস্থাৰ ভেকচিনৰ তালিকাত অন্তৰ্ভূক্ত নোহোৱাত মূলতঃ বিপদত পৰিছে ভাৰতৰ পৰা বিদেশলৈ যোৱা লোকসকল। কাৰণ বিমান যাত্ৰা কৰিবলৈ ভেকচিন লোৱাৰ প্ৰমাণপত্ৰৰ প্ৰয়োজন হয়।
যিসকল বিমান যাত্ৰীয়ে কোভাক্সিন লৈছে তেওঁলোকৰ প্ৰমাণপত্ৰ বিমান সংস্থা সমূহৰ লগতে বিদেশৰ প্ৰশাসনে গ্ৰহণ নকৰে। কাৰণ কোভাক্সিন বিশ্ব স্বাস্থ্য সংস্থাৰ তালিকাত নাই।
সেইবাবেই কোভাক্সিন লোৱা বিমান যাত্ৰীসকলক বিদেশত ভেকচিন নোলোৱাসকলৰ তালিকাতে ৰখা হৈছে।ভাৰত বা?্যটেকৰ ফালৰ পৰা বিশ্ব স্বাস্থ্য সংস্থাক কোভাক্সিনৰ নাম তালিকাত অন্তৰ্ভূক্ত কৰিবলৈ অনুৰোধ জনোৱা হৈছে যদিও বিশ্ব স্বাস্থ্য সংস্থাই সেয়া এতিয়াই সম্ভৱ নহয় বুলি ইংগিত দিছে।
ইয়াৰ ফলত ভাৰতীয় ভেকচিন কোভাক্সিনে বিশ্বজনীন স্বীকৃতি লাভৰ পৰাও বঞ্চিত হৈছে।
উল্লেখ্য ব্ৰিটেইন আৰু ভাৰতত সংহাৰ চলোৱা কৰোনাৰ দুয়োটা নতুন ষ্ট্ৰেইনক প্ৰতিৰোধ কৰিবলৈ সক্ষম কোভাক্সিন প্ৰতিষেধক। এই দাবী কৰিছে ভেকচিনটোৰ প্ৰস্তুতকাৰী প্ৰতিষ্ঠান ভাৰত বায়’টেকে।
আইচিএমআৰ আৰু ভাৰত বায়’টেকে প্ৰস্তুত কৰা কোভিড ভেকচিন কোভাক্সিন ইতিমধ্যে ভাৰতত প্ৰদান কৰি থকা হৈছে।
ভাৰত বায়’টেকৰ যুটীয়া পৰিচালন সঞ্চালক সুচিত্ৰা এলাই টুইটাৰত এই দাবী কৰি কয় যে মেডিকেল জাৰ্ণেল ‘ক্লীনিকেল ইনফেক্সছ ডিজিজ’ৰ এক প্ৰতিবেদনে কোভাক্সিন ভেকচিনে কৰোনাৰ নতুন ষ্ট্ৰেইনক প্ৰতিৰোধ কৰিবলৈ সক্ষম বুলি মন্তব্য কৰিছে।
জানিব পৰা মতে ‘নেশ্যনেল ইনষ্টিটিউট অৱ ভাইৰ’লজি আৰু আইচিএমআৰে যৌথভাৱে চলোৱা এক পৰীক্ষাত এই তথ্য পোহৰলৈ আহিছে।
ইফালে আমেৰিকাৰ ৰাষ্ট্ৰপতি জ’ বিদেনৰ মুখ্য স্বাস্থ্য উপদেষ্টা এন্থনি ফৌচিয়েও ভাৰতত প্ৰস্তুত কৰা কোভাক্সিনে ‘বি১৬১৭’ নামৰ ডাব্বল মিউটেন্ট প্ৰজাতিৰ কোভিভ ভাইৰাছক প্ৰতিৰোধ কৰিবলৈ সক্ষম বুলি মন্তব্য কৰিছিল।
উল্লেখ্য যে ব্ৰিটেইনত সংহাৰ চলোৱা কৰোনাৰ নতুন প্ৰজাতিৰ কৰোনাক ‘বি১১৭’ আৰু ভাৰতত সংহাৰ চলাই থকা কৰোনা ভাইৰাছক ‘বি১৬১৭’ বুলি কোৱা হৈছে।
