মেঘালয়ত বিগত ২৪ ঘণ্টাত কোভিড-১৯ৰ সংক্ৰমণৰ বাবে পুনৰ তিনিগৰাকী ব্যক্তিয়ে প্ৰাণ হেৰুৱায়।
ইয়াৰ ফলত মেঘালয়ত কোভিডৰ সংক্ৰমণৰ ফলত মৃত্যু হোৱা ব্যক্তিৰ সংখ্যা ১৩৮ গৰাকীলৈ বৃদ্ধি পায়।
মেঘালয়ত কোভিডৰ সংক্ৰমণ পূৰ্বৰ তুলনাত বহু পৰিমাণে হ্ৰাস পাইছে। শনিবাৰৰ দিনটোত মেঘালয়ত মাত্ৰ দুগৰাকী ব্যক্তি কোভিড সংক্ৰমিত হৈছে।
‘‘কোভিডৰ নতুন সংক্ৰমণ ক্ৰমান্বয়ে হ্ৰাস পাইছে। বিগত ২৪ ঘণ্টাত মাত্ৰ দুগৰাকী ব্যক্তি কোভিড প’জিটিভ হৈছে,’’ মেঘালয়ৰ স্বাস্থ্য বিভাগে এইদৰে উল্লেখ কৰে।
মেঘালয়ত বৰ্তমানলৈ মুঠ ১৩,৩৭১ গৰাকী ব্যক্তি কোভিডৰ দ্বাৰা সংক্ৰমিত হৈছে।
মেঘালয়ত বৰ্তমান ২৪৮ গৰাকী সক্ৰিয় কোভিড ৰোগী থকাৰ বিপৰীতে ১২৯৮৫ গৰাকী ব্যক্তি চিকিৎসাৰ অন্তত সুস্থ হৈ উঠিছে।
আনহাতে, ব্ৰিটেইনত নতুন ক’ৰ’না ভাইৰাছৰ প্ৰকাৰ ধৰা পৰাৰ পাছতে মেঘালয় চৰকাৰে ব্ৰিটেইনৰ পৰা উভতি অহা পৰ্যটক সকলৰ ৰাজ্যখনত প্ৰৱেশ নিষিদ্ধ কৰিছে।
মেঘালয় চৰকাৰে বিগত চাৰি সপ্তাহৰ ভিতৰত ব্ৰিটেইনৰ পৰা ৰাজ্যখনলৈ উভতি অহা নাগৰিকসকলক বাধ্যতামূলক কোভিড পৰীক্ষা কৰাৰ বাবে নিৰ্দেশ দিছে।
