অসম আৰক্ষীত এতিয়ালৈকে ৭৮৮গৰাকী কোভিড-১৯ পজিটিভ ধৰা পৰিছে। ইয়াৰ ভিতৰত ৩৭৭ গৰাকীয়ে এতিয়ালৈ আৰোগ্য লাভ কৰিছে।
আনহাতে, আক্ৰান্ত আৰক্ষীৰ লোকসকলক কোৱাৰেন্টাইনত ৰখা হৈছে।
অসম আৰক্ষীৰ শেহতীয়া এটা টুইট ৰিটুইট কৰি অসম আৰক্ষীৰ আইন-শৃংখলা শাখাৰ অতিৰিক্ত আৰক্ষী সঞ্চালক প্ৰধান জি পি সিঙে এইকথা সদৰী কৰিছে।
ইতিমধ্যে, কোভিড আক্ৰান্ত হোৱা ২৭গৰাকী আৰক্ষী বিষয়াই আৰোগ্য লাভ কৰাৰ পাছত কৰ্তব্যত যোগদান কৰিছে।
কোভিড-১৯ত আক্ৰান্ত হৈ এতিয়ালৈকে এগৰাকী আৰক্ষী বিষয়াৰ মৃত্যু ঘটিছে।
As on today, a total of 788 of our personnel have tested positive for #Corona, out of which 377 have recovered. One of our colleagues made the supreme sacrifice and inspires us every day.
After fighting bravely, 27 of our #CoronaWarriors have already joined back for duty. pic.twitter.com/HN563coqiD
— Assam Police (@assampolice) July 17, 2020
ইয়াৰ পূৰ্বে যোৱা ৬জুলাইত অসম আৰক্ষীৰ সঞ্চালক প্ৰধান ভাস্কৰ জ্যোতি মহন্তই জনাইছিল যে কোভিড-১৯ পজিটিভ পোৱাসকলৰ ভিতৰৰ ১৭১গৰাকী কোভিড কেয়াৰ চেন্টাৰত চিকিৎসাধীন হৈ আছে আৰু ৪৯গৰাকীয়ে আৰোগ্য লাভ কৰিছে।
‘অসমত কোভিড-১৯ আক্ৰান্তৰ সংখ্যা বৃদ্ধি পাইছে আৰু মহামাৰীৰ সৈতে সম্পৰ্কিত কৰ্তব্যত তথা আন আইন-শৃংখলাৰ কামত নিয়োজিত আৰক্ষী বিষয়াও আক্ৰান্ত হৈছে,’-তেওঁ কৈছিল।
অলপতে আৰক্ষী সঞ্চালক প্ৰধান গৰাকীৰ সুৰক্ষাত নিয়োজিত চাৰিগৰাকী বিষয়াৰো পজিটিভ ধৰা পৰিছিল। ইয়াৰ পাছতে আৰক্ষী সঞ্চালক প্ৰধান গৰাকীয়েও স্বাৱ টেষ্ট কৰে যদিও তেওঁৰ ফলাফল নিগেটিভ আহে।
