কোভিডে যেন এইবাৰ দেশত সকলো এপিনৰ পৰা শেষ কৰি যোৱাৰ বাবেহে সংহাৰ চলাইছে। দেশৰ ৰাজধানী চহৰ নতুন দিল্লীত কোভিডে পাতিছে মৃত্যুৰ উৎসৱ।
চৌদিশে কেৱল ৰোগী আৰু ৰোগী। ৰোগীৰ সংখ্যা যিদৰে বাঢ়িছে, একেদৰে বাঢ়িছে মৃতকৰ সংখ্যাও।
ৰাজধানী চহৰ খনৰ চিকিৎসালয় সমূহত এতিয়া আইচিইউৰ তীব্ৰ নাটনিয়ে দেখা দিছে। দিল্লীৰ বিভিন্ন চিকিৎসালয়ত থকা আইচিইউৰ মুঠ সংখ্যা হৈছে ৪৬৮৪ খন।
ইয়াৰে ৪৬৬৮ খন আইচিইউ বিচনা ইতিমধ্যে ৰোগীৰে ভৰি আছে। বাকী ৰৈছেগৈ মাত্ৰ ১৬ খন আইচিইউ বিচনা। ফলত মূৰে-কপালে হাত দিবলগীয়া পৰিস্থিতিৰ সৃষ্টি হৈছে দিল্লীৰ মুখ্যমন্ত্ৰী অৰবিন্দ কেজৰিৱালৰ।
কেৱল সেয়াই নহয়, দিল্লীৰ বহু চিকিৎসালয়ত তিয়া ৰোগীৰ বাবে অক্সিজেনৰ তীব্ৰ নাটনিয়ে দেখা দিয়া পৰিলক্ষিত হৈছে।
দিল্লীৰ উপমুখ্যমন্ত্ৰী মনিষ ছিচ’ডিয়াই প্ৰকাশ কৰা মতে পুৱাৰে পৰা তেওঁ বিভিন্ন চিকিৎসালয়ৰ পৰা অক্সিজেন শেষ হোৱাৰ বাৰ্তা পাই আছে।
আন চিকিৎসালয়ৰ পৰা অক্সিজেন যোগান ধৰাৰ বাবে চেষ্টা চলাই আছে যদিও সেয়াও পৰ্যাপ্ত হোৱা নাই।হাৰিয়ানৰ চৰকাৰক অক্সিজেন যোগানৰ বাবে অনুৰোধ জনোৱা বুলিও ছিচ’ডিয়াই প্ৰকাশ কৰে।
উল্লেখ্য দেশত কৰ’নাৰ সংক্ৰমণ এনেদৰে বৃদ্ধি পাইছে যে ই দৈনিক সংক্ৰমণৰ ক্ষেত্ৰত আমেৰিকাৰ ৰেকৰ্ডো ভংগ কৰিলে।
যোৱা ২৪ ঘন্টাত দেশত এদিনত সৰ্বাধিক আক্ৰান্তৰ ৰেকৰ্ড হৈছে। বুধবাৰে বিশ্বৰ সকলো ৰেকৰ্ড ভংগ কৰি প্ৰায় ৩লাখ ১৪হাজাৰ লোক কৰ’নাত আক্ৰান্ত হৈছে।
দেশত কৰ’না ভাইৰাছৰ সংক্ৰমণ ঘটাৰ পাছত এই প্ৰথমবাৰ দৈনিক আক্ৰান্তৰ সংখ্যাই ৩লাখ অতিক্ৰম কৰিলে।
কেন্দ্ৰীয় স্বাস্থ্য মন্ত্ৰ্যালয়ৰ তথ্য অনুসৰি বিগত ২৪ ঘন্টাত দেশত ৩লাখ ১৪হাজাৰ ৮৩৫জন লোক কৰ’নাত আক্ৰান্ত হৈছে। এয়া দৈনিক সংক্ৰমণৰ ক্ষেত্ৰত বিশ্বৰ ভিতৰতে সৰ্বাধক।
বিগত ২৪ ঘন্টাত দেশত ২হাজাৰ ১০৪জন লোকৰ কৰ’নাত মৃত্যু হৈছে। দেশত এতিয়া মুঠ মৃত্যুৰ সংখ্যা ১লাখ ৮৪হাজাৰ ৬৫৭জনলৈ বৃদ্ধি পাইছে।
সেইদৰে দেশত মুঠ আক্ৰান্ত সংখ্যা হৈছেগৈ ১কোটি ৫৯লাখ ৩০হাজাৰ ৯৬৫জন।
