তেজপুৰ মেডিকেল কলেজত কোভিড ৰোগী ন্যূনতম চিকিৎসা সেৱাৰ পৰাও বঞ্চিত হোৱাৰ অভিযোগ উঠিছে৷ তৃষ্ণাতুৰ ৰোগীয়ে এটুপি খোৱা পানীৰ বাবে হাঁহাকাৰ কৰিব লগা পৰিস্থিতৰো সৃষ্টি হোৱাৰ অভিযোগ উত্থাপন হৈছে৷
জানিব পৰা মতে বিশ্বনাথ চাৰিআলিৰ শান্তিপুৰৰ নিবাসী ৰতন মণ্ডল নামৰ ব্যক্তিজনৰ লগতে তেখেতৰ পত্নীৰ যোৱা ৯ মে’ তাৰিখে কোভিত পজিটিভ ওলোৱাৰ পাছতে ব্যক্তি দুজনক বিশ্বনাথ অসামৰিক চিকিৎসালয়ত ভৰ্তি কৰোৱা হয়৷
কিন্তু ৰতন মণ্ডলৰ স্বাস্থ্যৰ অধিক অৱনতি ঘটাৰ লগে লগে তেওঁক তেজপুৰ মেডিকেল কলেজলৈ উন্নত চিকিৱসাৰ বাবে স্থানান্তৰ কৰে৷ইফালে পত্নীক পুনৰ পৰীক্ষণত নেগটিভ ফলাফল অহাত ঘৰলৈ যাবলৈ দিয়া হয়৷
কিন্তু অতি পৰিতাপৰ বিষয় যে চিকিৎসা মহাবিদ্যালয়খনত উন্নত চিকিৎসাতো বাদেই, ন্যূনতম চিকিৎসাকণৰ পৰাও বঞ্চিত হৈ আছে ৰতন মণ্ডল নামৰ ব্যক্তিজন৷
অভিযোগ উঠিছে যে তেজপুৰ চিকিৎসা মহাবিদ্যালয়ত পৰ্যাপ্ত পৰিমাণৰ অক্সিজেনৰ অভাৱ, এটুপি খোৱা পানী দিয়াৰ বাবেও কোনো নাই৷নাই ন্যূনতম চিকিৎসাকণো৷
ইফালে, ৰোগীগৰাকীয়ে অক্সিজেনৰ অভাৱত কথা কোৱা সামৰ্থ্যও প্ৰায় হেৰুৱাই পেলাইছে৷ আনহাতে ব্যক্তিগত চিকিৎসালয়লৈ স্থানান্তৰ হ’বলৈ কথা পাতিবও পৰা নাই তেওঁ৷
এতিয়া প্ৰশ্ন হয়, এনেকৈয়ে চলিছে আছে নেকি চিকিৎসা মহাবিদ্যালয়সমূহৰ চিকিৎসা ব্যৱস্থা? ৰোগীক তিল তিলকৈ মৃত্যুৰ মূখলৈ ঠেলি দি হেতালি খেলিছে নেকি বিয়াগোম স্বাস্থ্য বিভাগটোৱে?
ৰতন মণ্ডলৰ দৰে আন বহুতো কোভিড ৰোগীয়ে উচিত চিকিৎসাৰ পৰা বঞ্চিত হৈ মৃত্যুৰ মুখলৈ গতি কৰাটোকে বিচাৰিছে নেকি তেজপুৰ চিকিৎসা মহাবিদ্যালয়ে? এনে বহু গুৰুত্বপূৰ্ণ প্ৰশ্ন উদ্ৰেক হৈছে সচেতন মহলৰ মাজত।
এইক্ষেত্ৰত নৱনিৰ্বাচিত স্বাস্থ্য মন্ত্ৰীগৰাকীয়ে কেনে ব্যৱস্থা গ্ৰহণ কৰে পৰৱৰ্তী সময়ত সেয়া লক্ষণীয় হ’ব৷
