বঙাইগাঁও জিলাত ক’ৰোনাৰ সংক্ৰমণ অব্যাহত আছে ৷ জিলাখনত সোমবাৰৰ দিনটোত নতুনকৈ ৪৯ জন ব্যক্তি ক’ভিড – ১৯ ত আক্ৰান্ত হৈছে ৷
আনহাতে মৃত্যু হৈছে দুজন ব্যক্তিৰ ৷ মৃত ব্যক্তিজন বঙাইগাঁও জিলাৰ চলন্তাপাৰাৰ জিয়াৰুল হক( ৭৩) আৰু মাণিকপুৰৰ বীৰেন নাথ(৫৮)৷
জিয়াৰুল হকৰ গোৱালপাৰা অসামৰিক চিকিৎসালয়ত চিকিৎসাধীন অৱস্থাত মৃত্যু হোৱাৰ বিপৰীতে বীৰেন নাথৰ গুৱাহাটী চিকিৎসা মহাবিদ্যালয় হাস্পতালত চিকিৎসাধীন অৱস্থাত মৃত্যু হয় ৷
ইপিনে জিলাখনত নতুনকৈ ৪৯ জন ব্যক্তিৰ দেহত ক’ভিড প’জিটিভ ধৰা পৰাত বৰ্তমান ২৩৪ জন ক’ভিডত আক্ৰান্ত সক্ৰিয় ৰোগী আছে ৷
ইয়াৰ ভিতৰত ১৪২ জন ইনষ্টিটিউচনেল কোৱাৰেণ্টাইনত আৰু ৯২ জন ব্যক্তি হোম কোৱাৰেণ্টাইনত আছে ৷ সেইদৰে সোমবাৰৰ দিনটোত সুস্থ হৈ উঠিছে ৪১ জনকৈ ৰোগী ৷
জিলাখনত সোমবাৰে মুঠ ৪,৫৪৯ জন ব্যক্তিক ক’ভিড টেষ্ট কৰা হয় ৷ আনহাতে জিলাখনত ১ মাৰ্চৰ পৰা ১৪ জুনলৈ মুঠ ক’ভিডত আক্ৰান্ত ৰোগীৰ সংখ্যা বৃদ্ধি পাই ৩,৩৪৭ জন হৈছে ৷
উল্লেখ্য যে জিলাখনত সোমবাৰৰ দিনটোত ক’ভিড প’জিটিভিটিৰ হাৰ আছিল ০.৯ শতাংশ ৷