কেন্দ্ৰই শীঘ্রে বিদেশ ভ্ৰমণলৈ যোৱা ভাৰতীয় লোকসকলক কোভিডৰ বুষ্টাৰ পালি প্ৰদানৰ দিহা কৰিব। বিশেষকৈ শিক্ষাগ্ৰহণ, চাকৰি,ক্ৰীড়া আৰু চৰকাৰী বা ব্যৱসায়িক কাম-কাজৰ বাবে বিদেশভ্ৰমণ কৰা সকলৰ বাবে কোভিড-১৯ ভেকছিনৰ সাৱধানতামূলক পালি আৰম্ভ কৰাৰ বাবে চৰকাৰে চিন্তা-চৰ্চা কৰি আছে।
আজি এগৰাকী চৰকাৰী মুখপাত্ৰই এই কথা প্ৰকাশ কৰে।
বিদেশ ভ্ৰমণলৈ যোৱা লোকসকলে ব্যক্তিগত ক্লিনিকত বুষ্টাৰ পালি গ্ৰহণ কৰিব পাৰিব আৰু ইয়াৰ বাবে প্ৰয়োজনীয় ধন পৰিশোধ কৰিব লাগিব।
উল্লেখ্য বৰ্তমান স্বাস্থ্যসেৱাৰ সৈতে জৰিত লোক, ফ্ৰণ্টলাইন কৰ্মী আৰু ৬০ বছৰৰ ওপৰৰ লোকসকলক কোভিড-১৯ ৰ ভেকছিনৰ সাৱধানতামূলক বুষ্টাৰ পালি প্ৰদান কৰি থকা হৈছে।
আন্তঃৰাষ্ট্ৰীয় বিমান চলাচলৰ সময়তে চৰকাৰে বিদেশ ভ্ৰমণলৈ যাবলগীয়া ভাৰতীয় লোকসকলক কোভিডৰ বুষ্টাৰ পালি প্ৰদানৰ কথা ভাবিছে।
ভাৰতে এই বছৰৰ ১০ জানুৱাৰীৰ পৰা স্বাস্থ্যসেৱা আৰু ফ্ৰণ্টলাইন কৰ্মীৰ লগতে ৬০ বছৰ বা ততোধিক বয়সৰ লোকসকলক কোভিড-১৯ৰ ভেকছিনৰ সাৱধানতা বুষ্টাৰ পালি প্ৰদান কৰা আৰম্ভ কৰিছিল।
একেদৰে ১৬ মাৰ্চৰ পৰা দেশত ১২ ৰ পৰা ১৪ বছৰ বয়সৰ শিশুক টিকাকৰণ আৰম্ভ কৰা হৈছিল।
স্বাস্থ্য মন্ত্ৰালয়ে লগতে দেশৰ ৬০ বছৰ বা তাতকৈ অধিক বয়সৰ লোকৰ বাবে বুষ্টাৰ পালিৰ সুবিধা উপলব্ধ কৰাৰ কথাও ঘোষণা কৰিছিল।
শিশুৰ টিকাকৰণ অভিযানত হায়দৰাবাদৰ বায়’লজিকেল ইভান্সে নিৰ্মাণ কৰা কৰ্বেভেক্স নামৰ ভেকচিন বিধ প্ৰদান কৰা হৈছে।
ইতিপূৰ্বে দেশৰ ১৪ বছৰ বয়সৰ উৰ্ধৰ শিশুৰ বাবে ক’ভিদ টিকাকৰণ অভিযান হৈ গৈছে।
