ক’ভিড-১৯ প্ৰতিষেধক গ্ৰহণৰ ফলত হোৱা পাৰ্শ্বক্ৰিয়া বা যিকোনো ধৰণৰ নেতিবাচক প্ৰভাৱৰ বলি হোৱা লোকসকলক সকাহ দিয়াৰ উদ্দেশ্যে ভাৰতৰ উচ্চতম ন্যায়ালয়ে এক যুগান্তকাৰী নিৰ্দেশ জাৰি কৰিছে। সৰ্বোচ্চ ন্যায়ালয়ে কেন্দ্ৰীয় চৰকাৰক ভুক্তভোগীসকলৰ বাবে শীঘ্ৰে এখন ‘বিনাদোষ ক্ষতিপূৰণ নীতি’ (No-fault compensation policy) প্ৰস্তুত কৰিবলৈ নিৰ্দেশ দিছে। এই নিৰ্দেশৰ জৰিয়তে প্ৰতিষেধকৰ ফলত স্বাস্থ্যৰ গুৰুতৰ অৱনতি ঘটা লোকসকলে বা অকালতে প্ৰাণ হেৰুওৱা ব্যক্তিৰ পৰিয়ালে চৰকাৰৰ পৰা উপযুক্ত আৰ্থিক সাহায্য লাভ কৰাৰ পথ প্ৰশস্ত হৈ পৰিছে।
উচ্চতম ন্যায়ালয়ৰ এই নিৰ্দেশনা অনুসৰি চৰকাৰে প্ৰণয়ন কৰিবলগীয়া ‘বিনাদোষ ক্ষতিপূৰণ’ নীতিৰ অৰ্থ হৈছে যে ক্ষতিপূৰণ দাবী কৰিবলৈ ভুক্তভোগীয়ে প্ৰতিষেধক প্ৰস্তুতকাৰী কোম্পানী বা চৰকাৰৰ অৱহেলা প্ৰমাণ কৰাৰ কোনো প্ৰয়োজন নাথাকিব। ন্যায়ালয়ে স্পষ্ট কৰি দিছে যে যদিও ক’ভিড টিকাকৰণ অভিযানে লাখ লাখ লোকৰ জীৱন ৰক্ষা কৰিছে, তথাপিও ইয়াৰ পাৰ্শ্বক্ৰিয়াৰ ফলত ক্ষতিগ্ৰস্ত হোৱা মুষ্টিমেয় লোকসকলৰ প্ৰতি ৰাষ্ট্ৰৰ দায়বদ্ধতা নুই কৰিব নোৱাৰি। টিকাকৰণৰ পাছত হোৱা প্ৰতিকূল পৰিঘটনাৰ ফলত জীৱন আৰু জীৱিকা হেৰুওৱা লোকসকলক সহায় কৰাটো এখন কল্যাণকামী ৰাষ্ট্ৰৰ প্ৰধান কৰ্তব্য বুলি ন্যায়ালয়ে দোহাৰিছে।
উল্লেখ্য যে ক’ভিড প্ৰতিষেধক গ্ৰহণৰ পাছত নিজৰ আত্মীয়ক হেৰুওৱা কেইবাটাও পৰিয়াল আৰু স্বাস্থ্যজনিত জটিলতাত ভোগা লোকসকলে ন্যায় বিচাৰি উচ্চতম ন্যায়ালয়ৰ কাষ চাপিছিল। আবেদনকাৰীসকলে যুক্তি দৰ্শাইছিল যে চৰকাৰে টিকাকৰণক একপ্ৰকাৰ বাধ্যতামূলক কৰি তুলিছিল আৰু জনসাধাৰণক ইয়াৰ বাবে অহৰহ উৎসাহিত কৰিছিল। তেনেক্ষেত্ৰত, প্ৰতিষেধক গ্ৰহণ কৰি কোনো ব্যক্তি গুৰুতৰভাৱে ক্ষতিগ্ৰস্ত হ’লে তাৰ সম্পূৰ্ণ নৈতিক আৰু আৰ্থিক দায়িত্ব চৰকাৰে গ্ৰহণ কৰা উচিত। এই আবেদনসমূহৰ শুনানি গ্ৰহণ কৰি ন্যায়ালয়ে চৰকাৰক এই গুৰুত্বপূৰ্ণ নিৰ্দেশনা প্ৰদান কৰে।
