শিৱসাগৰৰ ঢুলিয়াপাৰ নিবাসী বিশিষ্ট সমাজকৰ্মী চফিকুদ্দিন আহমেদ(ভাই)ৰ কোভিডত আক্ৰান্ত হৈ মৃত্যু হৈছে।
কিছুদিন পূৰ্বে কোভিডত আক্ৰান্ত হোৱা চফিকুদ্দিন আহমেদক যোৱা ১৬ মে’ত ডিব্ৰুগড় মেডিকেল কলেজত ভৰ্তি কৰোৱা হৈছিল আৰু তাতে মংগলবাৰে যুৱ সমজাকৰ্মীগৰাকীৰ মৃত্যু হয়।
সমাজকৰ্মী চফিকুদ্দিন আহমেদৰ মৃত্যুত সমগ্ৰ ঢুলীয়াপাৰ অঞ্চলত শোকৰ ছাঁ পৰিেছে।
ইপিনে শিৱসাগৰত দৈনিক দ্ৰুত গতিত বৃদ্ধি পাবলৈ ধৰিছে কোভিড আক্ৰান্তৰ সংখ্যা। মংগলবাৰৰ দিনটোত ১৫৩ গৰাকী ব্যক্তিৰ শৰীৰত ধৰা পৰিছে কোভিড পজিটিভ। বৰ্তমান জিলাখনত ৮৬৪ গৰাকী ব্যক্তি কোভিডত আক্ৰান্ত হৈ চিকিৎসা গ্ৰহণ কৰি আছে।
সমগ্ৰ ৰাজ্যৰ লগতে শিৱসাগৰতো চৰকাৰী নতুন এচঅ’পি অনুসৰি দিনৰ ১১ বজাত সকলো দোকান পোহাৰ, দৈনিক বজাৰ শ্বপিং ম’ল আদি বন্ধ কৰাৰ লগতে ১২ বজাৰ পৰা পুৱা ৫ বজালৈ সান্ধ্য আইন বলৱৎ কৰা হৈছে যদিও কোভিড আক্ৰান্ত সংখ্যা দিনে দিনে বৃদ্ধিহে পাবলৈ ধৰিছে।
মংগলবাৰে শিৱসাগৰত কোভিডত আক্ৰান্ত হৈ চিকিৎসাধীন হৈ থকা পাঁচগৰাকী ব্যক্তিৰ মৃত্যু হয়।
খাটপথাৰ নামতিয়াল পথাৰৰ অনিমা গগৈ(৪১), পানবেচাৰ হেমেন গগৈ(৪৫)। ইয়াৰোপৰি লাকুৱাৰ এগৰাকী ব্যক্তিকে ধৰি মুঠ পাঁচগৰাকী ব্যক্তিৰ আজি কোভিডত আক্ৰান্ত হৈ মৃত্যু হোৱা বুলি জানিব পৰা গৈছে।
ইপিনে শিৱসাগৰ ৰাজহ চক্ৰৰ অধীনত প্ৰায় ৪০০ টা কন্টেইনমেন্ট জ’ন ঘোষণা কৰা হৈছে বুলি কোভিড প্ৰটক’ল বিষয়া ৰিজু ৰহমানে জানিবলৈ দিয়ে।
