ৰেল লাইনৰ কাষত বহি প্ৰস্ৰাৱ কৰি আছিল এজন বৃদ্ধই। উফৰি অহা এটা গৰু গাতে পৰিলহি প্ৰস্ৰাৱ কৰি থকা বৃদ্ধগৰাকীৰ।
প্ৰথমে গৰুটো ক’ৰপৰা উৰি আহি বৃদ্ধৰ গাত পৰিলহি সেয়া এক ৰহস্যৰ বিষয় হৈ আছিল যদিও পিছত গম পোৱা গ’ল যে বৃদ্ধৰ গাত পৰা গৰুটো বন্দে ভাৰত এক্সপ্ৰেছত খুন্দাত উফৰি আহিছিল।
ৰেলৰ খুন্দাত উফৰি অহা গৰুটো গাত পৰাৰ ফলত থিতাতে নিহত হৈছে উক্ত বৃদ্ধগৰাকী।
ৰাজস্থানৰ আৰবলী বিহাৰ থানাৰ অন্তৰ্গত আলৱাৰত সংঘটিত হৈছে এই ঘটনা। মৃত ব্যক্তিজনৰ নাম শিৱদয়াল শৰ্মা।
শিৱদয়াল ভাৰতীয় ৰে’লৱেৰ এগৰাকী প্ৰাক্তন কৰ্মচাৰী। ২৩ বছৰ পূৰ্বে অৱসৰ গ্ৰহণ কৰিছিল তেওঁ।
শিৱদয়ালৰ আত্মীয়ই জনোৱা মতে, বুধবাৰে পুৱা প্ৰায় ৮:৩০ বজাত গেটৰ পৰা ওলাই আহিছিল বন্দে ভাৰত ৰে’লখন। সেই সময়ত হঠাতে ৰেল লাইনৰ মাজলৈ এটা গৰু আহিল। ৰেলখনৰ খুন্দাত গৰুটোৰ শৰীৰৰ এটা অংশ ৩০ মিটাৰ দূৰত থকা শিৱদয়ালৰ ডিঙিত খুন্দা মাৰেগৈ। সেই সময়ত তেওঁ প্ৰস্ৰাৱ কৰি আছিল। গৰুটো ডিঙিত পৰি থিতাতে মৃত্যু হয় শিৱদয়ালৰ।
অনুসৰি শিৱদয়ালৰ মৃতদেহ বুধবাৰে পুৱা মৰণোত্তৰ পৰীক্ষাৰ বাবে জিলা চিকিৎসালয়লৈ প্ৰেৰণ কৰা হয়।
অৱশ্যে বন্দে ভাৰতৰ গৰুৰ সৈতে হোৱা সংঘৰ্ষ এইটোৱেই প্ৰথম নহয়। ইয়াৰ উপৰিও বন্দে ভাৰত এক্সপ্ৰেছৰ বিভিন্ন পথত গৰু–ম’হৰ খুন্দা মৰাৰ অনেক ইতিহাস আছে।
