যোৱা নিশা (৮ ডিচেম্বৰ) আগৰতলাত দুষ্কৃতিকাৰীয়ে CPI (M)ৰ কাৰ্যালয় ভাঙি লণ্ডভণ্ড কৰি তাত অগ্নিসংযোগ কৰে। ঘটনা সংঘটিত হৈছিল ত্ৰিপুৰাৰ মুখ্য মন্ত্ৰীৰ সমষ্টিৰ অধীনৰ ধলেশ্বৰত।
CPI (M)ৰ একাংশ নেতা-কৰ্মীয়ে বিজেপিৰ ‘গুণ্ডাবাহীনিয়ে’ এই কাৰ্য সংঘটিত কৰা বুলি অভিযোগ কৰিছে।
স্থানীয় লোকৰ মতে যোৱা নিশা প্ৰায় ১ বজাত CPI (M)ৰ কাৰ্যালয়ত অচিনাক্ত দুৰ্বৃত্তৰ এটা দলে প্ৰৱেশ কৰি আচবাব, কিতাপ-পত্ৰ আদি লণ্ডভণ্ড কৰি পিছত অংগ্নিসংযোগ কৰে।
কাৰ্যালয়টোৰ পৰা ধোঁৱা উলাই থকা দেখা পাই স্থানীয় লোকে অগ্নিনিৰ্বাপক বাহিনীক খবৰ দিয়াত ৪খন অগ্নিনিৰ্বাপক বাহিনীৰ গাড়ী আহি জুই নিৰ্বাপন কৰে যদিও ইতিমধ্যে কিতাপভৰ্তি ৪/৫টা আলমাৰি, চকী, টেবুলকে ধৰি সকলো সা-সামগ্ৰী জুইত জাহ যায়।
আজি পুৱা এই বাতৰি বিয়পি পৰাৰ পিছতে প্ৰাক্তন মুখ্য মন্ত্ৰী মাণিক সৰকাৰ আৰু আন কেইবাগৰাকী CPI (M)ৰ নেতা পাৰ্টি অ’ফিচত উপস্থিত হয়।
এই সম্পৰ্কে প্ৰতিক্ৰিয়া প্ৰকাশ কৰি মাণিক সৰকাৰে কয়, ‘ঘটনা সংঘটিত হোৱা স্থানখিনি মুখ্য মন্ত্ৰীৰ সমষ্টিৰ ভিতৰত পৰে, ইয়াতকৈ আৰু মোৰ একো ক’বলগীয়া নাই।‘
দলটোৰ আন এগৰাকী নেতা অমল চক্ৰবৰ্তীয়ে এই কাম বিজেপিৰ দুষ্কৃতিকাৰীয়ে সংঘটিত কৰা বুলি কয়। ঘটনা সংক্ৰান্তত দলটোৱে এখন এজাহাৰ দাখিল কৰিছে যদিও আৰক্ষীয়ে বাতৰি লিখা পৰ্যন্ত কাকো আটক কৰা নাই।
