অসম বিধানসভা নিৰ্বাচনৰ পূৰ্বে বিৰোধীৰ ঐক্যমঞ্চ ‘অসম সন্মিলিত মৰ্চা’ৰ ভিতৰচ’ৰাত ব্যাপক খহনীয়া আৰম্ভ হৈছে। শাসনাধিষ্ঠিত বিজেপিৰ বিৰুদ্ধে একগোট হৈ যুঁজ দিয়াৰ সংকল্প লোৱাৰ মাত্ৰ দুমাহ নৌহওঁতেই মৰ্চাৰ অন্যতম অংশীদাৰ ভাৰতীয় কমিউনিষ্ট পাৰ্টীয়ে নিৰ্বাচনত অকলে প্ৰতিদ্বন্দ্বিতা কৰাৰ সিদ্ধান্ত ঘোষণা কৰিছে।
মৰ্চাৰ ভিতৰত দেখা দিয়া এই বিভাজনে এতিয়া ৰাজ্যৰ ৰাজনৈতিক মহলত তীব্ৰ চাঞ্চল্যৰ সৃষ্টি কৰিছে। বিশেষকৈ কংগ্ৰেছ দলৰ সৈতে আসন বুজাবুজিৰ ক্ষেত্ৰত হোৱা মতানৈক্যৰ বাবেই এই চৰম সিদ্ধান্ত ল’বলৈ বাধ্য হোৱা বুলি চিপিআইয়ে স্পষ্ট কৰি দিছে।
চিবিআইয়ে জানিবলৈ দিয়া মতে তেওঁলোকে শিৱসাগৰ, নাজিৰা, তিতাবৰ, মৰিগাঁও, ঢকুৱাখনা, ডিমৌ আৰু গৌৰীপুৰ সমষ্টিত নিজাকৈ প্ৰাৰ্থী প্ৰক্ষেপ কৰিব। ইতিমধ্যে কেইবাটাও সমষ্টিৰ বাবে প্ৰাৰ্থীৰ নামো প্ৰস্তাৱ কৰা হৈছে। তিতাবৰৰ বাবে বিশ্বজিত শইকীয়া, ঢকুৱাখনাৰ বাবে ধীৰেন কছাৰী, গৌৰীপুৰৰ বাবে শ্বেখ মনচুৰ ৰহমান, মৰিগাঁৱৰ বাবে সপন ডেকা, ডিমৌৰ বাবে কৃষ্ণ গগৈ আৰু নাজিৰা সমষ্টিৰ বাবে কনক গগৈৰ নাম দলীয়ভাৱে আলোচনা কৰা হৈছে। শিৱসাগৰ সমষ্টিৰ বাবে চাৰিজনকৈ প্ৰাৰ্থীৰ নাম জিলা পৰ্যায়ৰ পৰা প্ৰেৰণ কৰা হৈছে।
দলটোৰ ৰাজ্যিক সম্পাদক কনক গগৈয়ে ক্ষোভেৰে প্ৰকাশ কৰিছে যে যোৱা ২ জানুৱাৰীতে তেওঁলোকে কংগ্ৰেছক সাতখন আসনৰ দাবী জনাইছিল যদিও বিগত ২৫ দিন ধৰি কংগ্ৰেছৰ পৰা কোনো সঁহাৰি পোৱা নগ’ল। ইয়াৰ বিপৰীতে ৰাইজৰ দল আৰু অসম জাতীয় পৰিষদৰ দৰে দলসমূহৰ সৈতে কংগ্ৰেছে চলোৱা আলোচনাৰ খবৰে চিপিআইৰ নেতৃত্বক মৰ্মাহত কৰিছে। আনকি মৰ্চাৰ ভিতৰত চিপিআইৰ প্ৰাসংগিকতাক লৈও প্ৰশ্ন উত্থাপন হোৱা বুলি জানিব পৰা গৈছে। এনে পৰিপ্ৰেক্ষিতত নিজৰ অস্তিত্ব ৰক্ষাৰ স্বাৰ্থতে দলটোৱে অকলশৰে আগবাঢ়িবলৈ সিদ্ধান্ত লৈছে।
অৱশ্যে মৰ্চাই তেওঁলোকৰ সৈতে উপযুক্ত আলোচনা কৰে আৰু সন্মত হয়, তেন্তে তেওঁলোকে আসনৰ সংখ্যা হ্ৰাস কৰিবলৈও সাজু আছে বুলি জানিবলৈ দিছে। মন কৰিবলগীয়া যে ২০২৫ চনৰ নৱেম্বৰ মাহত বিজেপিৰ বিৰুদ্ধে এখন সবল মঞ্চ গঢ়ি তোলাৰ স্বাৰ্থতে এই মৰ্চা গঠন কৰা হৈছিল। কিন্তু নিৰ্বাচন চমু চাপি অহাৰ লগে লগে আসন ভাগ-বাটোৱাৰাক লৈ সৃষ্টি হোৱা এই সংঘাতৰ বাবে মৰ্চাৰ ঐক্য এতিয়া তীব্ৰ সংকটৰ মুখত পৰিছে। ইফালে ৩১ জানুৱাৰীৰ ভিতৰত আসন চূড়ান্ত কৰিবলৈ আন দুই সহযোগী দল ৰাইজৰ দল আৰু অসম জাতীয় পৰিষদেও কংগ্ৰেছক সময়সীমা বান্ধি দিছে।
