মধ্যপ্ৰদেশৰ সতনা লোকসভা সমষ্টিৰ বিজেপি সাংসদ গণেশ সিঙৰ এটা ভিডিঅ’ সামাজিক মাধ্যমত ভাইৰেল হোৱাৰ পাছত তীব্ৰ বিতৰ্কৰ সৃষ্টি হৈছে। শুকুৰবাৰে চৰ্দাৰ বল্লভভাই পেটে’লৰ ১৫০ বছৰীয়া জন্মজয়ন্তী উপলক্ষে বিজেপিয়ে আয়োজন কৰা ‘ৰাণ ফৰ ইউনিটি’ কাৰ্যসূচীৰ সময়ত এই ঘটনাটো ঘটে।
‘ৰাণ ফৰ ইউনিটি’ সমদল মহানগৰীৰ ছেমৰিয়া চকত উপস্থিত হোৱাৰ পাছত ক্ৰেণৰ সহায় লোৱা হৈছিল যাতে গণ্যমান্য ব্যক্তিসকলে ভীমৰাও আম্বেদকাৰৰ প্ৰতিমূৰ্তিত মাল্যাৰ্পণ কৰিব পাৰে।
সাংসদ গণেশ সিং আৰু বিজেপিৰ জিলা সভাপতি ভাগৱতী পাণ্ডে ক্ৰেণৰ ওপৰত উঠাৰ সময়ত ক্ৰেণখন হঠাৎ আবদ্ধ হৈ পৰাত জোকাৰণি হয়।
অভিযোগ অনুসৰি, ক্ৰেণখনৰ এই জোকাৰণিত সাংসদগৰাকী ক্ষুব্ধ হৈ পৰে। ভাইৰেল হোৱা ভিডিঅ’টোত দেখা গৈছে যে ক্ৰেণৰ কেবিনৰ ভিতৰত বহি থকা অৱস্থাত সাংসদজনে ক্ৰেণ চালকৰ হাতত ধৰিছিল আৰু তাৰ পাছত তেওঁৰ গালত চৰ সোধাইছিল।
ভিৰৰ মাজত থকা বহু লোকে এই দৃশ্য মোবাইলত বন্দী কৰে। এই ঘটনাক কেন্দ্ৰ কৰি সতনাত তীব্ৰ বিতৰ্কৰ সৃষ্টি হৈছে।
সতনাৰ কংগ্ৰেছ বিধায়ক সিদ্ধাৰ্থ কুশৱাহাই এই কাণ্ডক ‘মানৱ সমাজৰ বাবে লজ্জাজনক’ বুলি অভিহিত কৰিছে।
তেওঁ অভিযোগ কৰে যে “বিজেপিৰ নেতাসকলৰ ক্ষমতাই মূৰত ধৰিছে। ভুল তেওঁলোকৰে আছিল, কিয়নো তেওঁলোকে ক্ৰেণৰ ওপৰত উঠিব নালাগিছিল, অন্ততঃ ক্ৰেণখন পূৰ্বে পৰীক্ষা কৰি ল’ব লাগিছিল।”
কুশৱাহাই লগতে দাবী কৰে যে এই কাণ্ডই সাংসদগৰাকীৰ চৰিত্ৰ প্ৰতিফলিত কৰিছে, আৰু তেওঁ চালকজনক ৰাজহুৱাভাৱে ক্ষমা খুজিব লাগে।
যদিও সাংসদ গণেশ সিং বা বিজেপিয়ে এই সন্দৰ্ভত কোনো আনুষ্ঠানিক বিবৃতি দিয়া নাই, বিজেপিয়ে ভুক্তভোগী ক্ৰেণ চালক গণেশ কুশৱাহাৰ এটা ভিডিঅ’ বিবৃতি সামাজিক মাধ্যমত প্ৰকাশ কৰিছে।
এই ভিডিঅ’ত চালকজনে দাবী কৰিছে, “সাংসদজন মোৰ ডাঙৰ ভাতৃৰ দৰে আৰু মই তেওঁৰ সৰু ভাতৃ। তেওঁ মোক আক্ৰমণ কৰা নাছিল, মাত্ৰ মোৰ কান্ধত হাত থৈছিল। এনে কোনো কাণ্ড সংঘটিত হোৱা নাছিল। এই সকলোবোৰ উৰাবাতৰি।”
