খেলপথাৰতে মৃত্যুক সাৱটিলে আন এজন ক্ৰিকেটাৰে। শনিবাৰে আহমেদাবাদত এখন মেচ খেলি থাকোতে হৃদৰোগত আক্ৰান্ত হৈ মৃত্যু ঘটে ক্ৰিকেটাৰ বসন্ত ৰাঠোৰৰ। ৩৪ বছৰীয়া ক্ৰিকেটাৰজনে বলিং কৰোঁতে হৃদৰোগত আক্ৰান্ত হৈছিল। চিকিৎসালয়ত তেওঁৰ মৃত্যু হয়। গুজৰাটত যোৱা ১০ দিনত তিনিজন ক্ৰিকেটাৰৰ এইদৰে মৃত্যু হৈছে।
গুজৰাটৰ সামগ্ৰী আৰু সেৱা কৰ (জিএছটি) বিভাগৰ কৰ্মচাৰী বসন্তৰ নিচা আছিল ক্ৰিকেট। সেই ক্ৰিকেট খেলি থাকোতে তেওঁ মৃত্যুৰ কোলাত ঢলি পৰে। বসন্তই আহমেদাবাদৰ ওচৰৰ এখন দন্ত মহাবিদ্যালয়ৰ খেলপথাৰত স্থানীয় ক্ৰিকেট প্ৰতিযোগিতাৰ এখন খেলত খেলি আছিল।
তেওঁ এজন অলৰাউণ্ডাৰ আছিল। বলিং কৰোঁতে বসন্তই প্ৰথমতে অস্বস্তি অনুভৱ কৰে। তাৰপিছতে বুকুৰ বিষ আৰম্ভ হয়। সতীৰ্থ তথা সংগঠকসকলে প্ৰথমে তেওঁক দন্ত মহাবিদ্যালয়লৈ লৈ যায়।
তাৰপিছতে বসন্তক ততাতৈয়াকৈ স্থানীয় চোলা অসামৰিক চিকিৎসালয়লৈ লৈ যোৱা হয় কিয়নো তেওঁৰ অক্সিজেনৰ স্তৰ দ্ৰুতগতিত হ্ৰাস পাইছিল।চিকিৎসা আৰম্ভ হৈছিল যদিও বসন্ত ৰক্ষা কৰিব পৰা নগ’ল।চিকিৎসালয়ত বসন্তৰ মৃত্যু হয়।
চিকিৎসকসকলে জনায় যে তেওঁৰ গুৰুতৰ হাৰ্ট এটেকৰ ফলত মৃত্যু হৈছে। বস্ত্ৰপুৰৰ বাসিন্দা বসন্তৰ পত্নী আছে।
তেওঁৰ সতীৰ্থসকলে জনায় যে বসন্ত আগৰে পৰা অসুস্থ নাছিল। গুজৰাটৰ সামগ্ৰী আৰু সেৱা কৰ বিভাগৰ এজন বিষয়াই কয়, “আমাৰ দলটোৱে ফিল্ডিং কৰি আছিল। বসন্ত আৰম্ভণিৰ পৰা ঠিকেই আছিল। হঠাতে তেওঁ বুকুত বিষ অনুভৱ কৰে আৰু মৃত্যুবৰণ কৰে। তেওঁৰ সতীৰ্থসকলে চেষ্টা কৰিছিল যদিও একো কৰিব নোৱাৰিলে।”
স্থানীয় সংবাদ মাধ্যমৰ মতে, যোৱা ১০ দিনত তিনিজন ক্ৰিকেটাৰৰ এইদৰে খেলি মৃত্যু হৈছে। প্ৰথম দুজন ক্ৰিকেটাৰ হৈছে ৰাজকোটৰ বাসিন্দা প্ৰশান্ত ভৰোলিয়া (২৭) আৰু চুৰাটৰ বাসিন্দা জিগনেশ চৌহান (৩১)। তেওঁলোক সকলোৰে হৃদৰোগত মৃত্যু হৈছিল। এনে ঘটনাই গুজৰাটৰ ক্ৰিকেট মহলত শোকৰ ছাঁ পেলাইছে।
