পুনৰ ৰন্ধন গেছৰ নাটনিয়ে উত্তৰ-পূৰ্বাঞ্চলত সমস্যাৰ সৃষ্টি কৰাৰ সম্ভাৱনাই দেখা দিছে। নৰ্থ ইষ্ট পেক্ট এল পি জি ট্ৰেন্সপ’ৰ্টাৰ এছোচিয়েশ্যনে ৰন্ধন গেছৰ চিলিণ্ডাৰ পৰিবহণ বন্ধ কৰি ৰখাৰ বাবেই সমগ্ৰ উত্তৰ পূৰ্বাঞ্চলতে ৰন্ধন গেছৰ ব্যাপক নাটনি হোৱাৰ সম্ভাৱনাই দেখা দিছে।
জানিব পৰা মতে, বৃহস্পতিবাৰে নিশাৰপৰাই সমগ্ৰ উত্তৰ পূৰ্বাঞ্চলত চিলিণ্ডাৰ কঢ়িওৱা বাহন সমূহ বন্ধ হৈ পৰিব। উত্তৰ পূৰ্বাঞ্চলৰ বটলিং প্লান্টৰ পৰা ৰন্ধন গেছৰ চিলিণ্ডাৰ পৰিবহন বাহনসমূহ বন্ধ হৈ পৰাৰ ফলত সমগ্ৰ উত্তৰ পূৰ্বাঞ্চলতেই ৰন্ধন গেছৰ বৃহৎ নাটনিয়ে দেখা দিয়াটো নিশ্চিত।
গেছ চিলিণ্ডাৰ পৰিবহনৰ বাবে প্ৰায় ৪০০ খন বাহনৰ চলাচল বন্ধ হৈ যোৱাৰ ফলত উত্তৰ-পূৰ্বাঞ্চলত থকা ১১টা বটলিং প্লান্ট সম্পূৰ্ণৰূপে বন্ধ হৈ পৰিব। তদুপৰি, বটলিং প্লান্টসমূহত দৈনিক তৈয়াৰ হোৱা প্ৰায় ১ লাখ ২২ হাজাৰ ৰন্ধন গেছৰ নাটনিয়ে গ্ৰাহকৰ বাবে হাহাকাৰ সৃষ্টি কৰিব।
ইপিনে, নৰ্থ ইষ্ট পেক্ট এল পি জি ট্ৰেন্সপ’ৰ্টাৰ এছ’চিয়েশ্যনে উত্তৰ-পূৰ্বাঞ্চলৰ বিভিন্ন ৰাজ্যলৈ চিলিণ্ডাৰ পৰিবহণৰ নিবিদাৰ বাবে ইণ্ডিয়ান অইল কৰ্পৰেশ্যনৰ মুখ্য় কাৰ্যালয় গুৱাহাটীৰ পৰা কলকাতালৈ স্থানান্তৰ কৰা, চিলিণ্ডাৰ কঢ়িওৱা ট্ৰাকৰ পৰিবহণ মূল্য় নিবিদাত ২১% হ্ৰাস কৰাৰ বিপৰীতে ৫০%লৈ নিৰিখ বৃদ্ধি কৰা আদি দাবীত বৃহস্পতিবাৰৰ পৰা অনিৰ্দিষ্ট কাললৈ চিলিণ্ডাৰ কঢ়িওৱা বাহন সমূহ বন্ধ ৰখাৰ সিদ্ধান্ত গ্ৰহণ কৰিছে।
তেওঁলোকৰ উক্ত দাবীসমূহ পূৰণ নোহোৱা পৰ্যন্ত যদি বাহন সমূহ বন্ধ ৰখা হয় তেনেহ’লে সমগ্ৰ উত্তৰ-পূৰ্বাঞ্চলত ৰন্ধন গেছৰ বৃহৎ নাটনিয়ে জনসাধাৰণৰ মাজত তীব্ৰ সমস্যাৰ সৃষ্টি কৰিব। অৱশ্যে, এইক্ষেত্ৰত জনসাধাৰণৰ সমস্যাৰ প্ৰতি লক্ষ্য ৰাখি সংশ্লিষ্ট কৰ্তৃপক্ষই শীঘ্ৰেই এক সমাধান সূত্ৰ বিচাৰি উলিওৱাৰ আসা কৰা হৈছে।
