NEET, SSC-ৰ পিছত কলেজৰ প্ৰৱেশ পৰীক্ষা। পুনৰ এটা সৰ্বভাৰতীয় পৰীক্ষাত আন এক ডাঙৰ বিভ্ৰাট। শনিবাৰে সমগ্ৰ দেশতে অনুষ্ঠিত হ’বলগীয়া আছিল CUET UG পৰীক্ষা। সেই অনুসৰি পৰীক্ষা কেন্দ্ৰত উপস্থিত হ’ল ছাত্ৰ-ছাত্ৰী। কিন্তু শেষ মুহূৰ্তত তেওঁলোকে গম পালে যে কেইবাটাও পৰীক্ষা কেন্দ্ৰত কাৰিকৰী ত্ৰুটি ধৰা পৰিছে। ফলত পৰীক্ষা স্থগিত ৰখা হয়।
এই খবৰ পোৱাৰ পিছতে উত্তেজিত হৈ পৰে ছাত্ৰ-ছাত্ৰীসকল। কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানক প্ৰশ্ন উত্থাপন কৰি বিৰোধীয়ে প্ৰশ্ন কৰিছে যে কেন্দ্ৰীয় সংস্থাটোৱে পৰিচালনা কৰা পৰীক্ষাত বাৰে বাৰে ইমান ডাঙৰ ত্ৰুটি কিয় সংঘটিত হৈছে।
কিছুদিন পূৰ্বে প্ৰশ্ন ফাদিলৰ বাবে বাতিল কৰা হৈছিল সৰ্বভাৰতীয় চিকিৎসা প্ৰৱেশ পৰীক্ষা NEET। তাৰ পিছত SSC GD পৰীক্ষাক লৈ একাধিক অভিযোগ উত্থাপন হৈছিল। কোনো কোনো ঠাইত আসনতকৈ অধিক পৰীক্ষাৰ্থীক এডমিট দিয়া হৈছিল, কোনো কোনো ঠাইত প্ৰশ্ন ফাদিল হৈছিল, কোনো কোনো ঠাইত পৰীক্ষাৰ সময়ত চিষ্টেম ক্ৰেচ হৈছিল – পৰীক্ষাৰ্থীয়ে বিভিন্ন সমস্যাৰ সন্মুখীন হৈছিল। ইয়াৰ বাবে পৰীক্ষা বাতিল কৰিবলগীয়া হয়। পৰীক্ষা ব্যৱস্থাটো বাৰে বাৰে হেক কৰা হৈছে বুলিও শুনা গৈছে। এইবাৰ CUET UG পৰীক্ষাতো এই সমস্যা ধৰা পৰিছে।
শনিবাৰে ৰাষ্ট্ৰীয় পৰীক্ষণ সংস্থাই (এনটিএ) জনাইছে যে অনলাইন পৰীক্ষা কেন্দ্ৰ টিচিএছত কিছু কাৰিকৰী ত্ৰুটি ধৰা পৰিছে। ইয়াৰ বাবে পৰীক্ষা পিছুৱাই দিব লগা হ’ল। লগতে এন টি এয়ে অতিৰিক্ত সময় দিয়া হ’ব বুলিও জানিবলৈ দিয়ে।
কিন্তু এই ঘটনাক লৈ ক্ষুব্ধ হৈ পৰে ছাত্ৰ-ছাত্ৰী। একাধিক পৰীক্ষা কেন্দ্ৰৰ সন্মুখত তেওঁলোকে প্ৰতিবাদ কৰিবলৈ আৰম্ভ কৰে। পুৱা ৯ বজাৰ পৰা তেওঁলোকৰ পৰীক্ষা আৰম্ভ হোৱাৰ কথা আছিল যদিও পুৱা ১১:৩০ বজাত তেওঁলোকে পৰীক্ষা কেন্দ্ৰত প্ৰৱেশ কৰিব পাৰিছিল। বহুসময়ৰ মূৰত তেওঁলোকে পৰীক্ষাত বহিব পাৰে। বিয়লি ৩ বজাৰ পৰিৱৰ্তে বিয়লিৰ পৰীক্ষা চাৰি বজাত আৰম্ভ হ’ব বুলি এন টি এয়ে জানিবলৈ দিয়ে।
সমগ্ৰ ঘটনাক লৈ কেন্দ্ৰক তীব্ৰ সমালোচনা কৰিছে আপ নেতা আতিশীয়ে। তেওঁৰ ভাষাত “শিক্ষামন্ত্ৰীৰ অভূতপূৰ্ব অযোগ্যতা। লাখ লাখ ছাত্ৰ-ছাত্ৰীয়ে ঘণ্টাৰ পিছত ঘণ্টা থিয় হৈ থাকি শেষত পৰীক্ষা পিছুৱাই দিয়াৰ কথা শুনিছে।” পৰীক্ষাৰ্থীৰ প্ৰতিবাদৰ ভিডিঅ’ও শ্বেয়াৰ কৰে তেওঁ। যদিও সমগ্ৰ ঘটনাক লৈ এতিয়াও নিমাত শিক্ষামন্ত্ৰী। প্ৰশ্ন উত্থাপন হয়, কিয় বাৰে বাৰে এই সৰ্বভাৰতীয় পৰীক্ষাবোৰত ত্ৰুটিৰ সৃষ্টি হৈছে? নিয়ন্ত্ৰক সংস্থাই কিয় পৰীক্ষাৰ্থীৰ স্বাৰ্থ সুৰক্ষিত কৰা নাই?
