ৰাজ্য জেকাৰি যোৱা দৰঙৰ বুঢ়া আৰক্ষী চকীৰ ঘটনাৰ এক বিতং প্ৰতিবেদন বিচাৰি অসমৰ মুখ্য সচিব আৰু আৰক্ষী সঞ্চালক প্ৰধানলৈ জাননী জাৰি কৰিছে ৰাষ্ট্ৰীয় মানৱ অধিকাৰ আয়োগ (NHRC)এ।
মানৱ অধিকাৰ আয়োগে অহা চাৰি সপ্তাহৰ ভিতৰত প্ৰতিবেদন দাখিল কৰিবলৈ কয়, প্ৰতিবেদনত ভুক্তভুগী মহিলা গৰাকীৰ স্বাস্থ্য পৰীক্ষাৰ তথ্যৰ লগতে তেওঁৰ বৰ্তমান স্বাস্থ্যৰ অৱস্থা সন্নিবিষ্ট থাকিব লাগিব বুলি কোৱা হয়।
উল্লেখযোগ্য যে দৰঙৰ বুঢ়া আৰক্ষী চকীৰ ভাৰপ্ৰাপ্ত বিষয়া মহেন্দ্ৰ শৰ্মাৰ বিৰুদ্ধে ৩ গৰাকী মহিলাই তেওঁলোকক লকআপৰ ভিতৰত উলংগ কৰি মাৰপিত কৰাৰ অভিযোগ আনে।
১৬ ছেপ্টেম্বৰত এই ঘটনা পোহৰলৈ অহাত ৰাজ্যজুৰি সৃষ্টি হৈছে তীব্ৰ প্ৰতিক্ৰিয়াৰ।
ইয়াৰ পিছতে ছ্যু মটো জাৰি কৰি মানৱ অধিকাৰ আয়োগে কয় যে যদিহে সংবাদ মাধ্যমত প্ৰকাশিত বাতৰি সঁচা তেন্তে ই গুৰুতৰ ৰূপত মানৱ অধিকাৰ উলংঘন কৰিছে।
আয়োগৰ মতে দাখিল কৰিবলগীয়া প্ৰতিবেদনত ৮ ছেপ্টেম্বৰৰ নিশা আৰক্ষীয়ে ভুক্তভূগী মহিলা কেইগৰাকীক গ্ৰেপ্তাৰ কৰা পূৰ্বে ন্যায়িক দণ্ডাধিশৰ পৰা আগতিয়া অনুমতি লোৱা হৈছিল নে সেই কথা উল্লেখ থাকিব লাগিব।
‘আয়োগে এইটোও জানিব খোজে যে ভুক্তভূগীক যিকোনো ধৰণৰ সাহায্য আৰু পৰামৰ্শ দিয়াৰ বাবে ৰাজ্য চৰকাৰে কিবা পদক্ষেপ গ্ৰহণ কৰিছে নে নাই কৰা’ এগৰাকী বিষয়াই কয়।
তদুপৰি আয়োগৰ মতে মহিলা কেইগৰাকীক সন্ধিয়া ঘৰৰ পৰা উঠাই অনা কাৰ্য্যৰ জৰিয়তে (যিটো সংবাদ মাধ্যমত প্ৰকাশ পাইছে) আৰক্ষীয়ে Cr.P.Cৰ ৪৬(৪) ধাৰা উলংঘা কৰিছে।
আনহাতে ৰাষ্ট্ৰীয় মানৱ অধিকাৰ আয়োগৰ উপৰিও ৰাষ্ট্ৰীয় মহিলা আয়োগেও (NCW) ৰাজ্যৰ আৰক্ষী সঞ্চালক প্ৰধানৰ পৰা ঘটনাটোৰ এক বিতং প্ৰতিবেদন বিচাৰিছে।
‘আয়োগে অসমৰ আৰক্ষী সঞ্চালক প্ৰধানক বিষয়টো গুৰুত্বসহকাৰে লৈ দোষীয়ে যাতে কঠোৰ শাস্তি পাই সেয়া নিশ্চিত কৰিবলৈ নিৰ্দেশ দিয়ে‘ ৰাষ্ট্ৰীয় মহিলা আয়োগৰ এক বিজ্ঞপ্তিত প্ৰকাশ।