অসমত বন্যপ্ৰাণীৰ অংগ প্ৰত্যংগৰ অবৈধ সৰবৰাহৰ বিৰুদ্ধে এক ডাঙৰ সফলতা লাভ কৰিছে গুৱাহাটী সীমা শুল্ক বিভাগৰ এণ্টি স্মাগলিং ইউনিটে। দৰং জিলাৰ ছিপাঝাৰৰ হাজৰিকাপাৰাত চলোৱা এক অভিযানত বিভাগে ৯.৬ কিলোগ্ৰাম ওজনৰ হাতীৰ দাঁত জব্দ কৰিবলৈ সক্ষম হয়।
এজন ব্যক্তিৰ ওচৰত হাতীৰ দাঁত মজুত থকা আৰু সেইবোৰ বিক্ৰীৰ বাবে গ্ৰাহক বিচাৰি থকা বুলি এক গোপন খবৰ লাভ কৰিছিল সীমা শুল্ক বিভাগে। সেই তথ্যৰ ওপৰত ভিত্তি কৰিয়েই কাস্টমছৰ দলটোৱে অঞ্চলটোৰ এক আৱাসিক গৃহত তালাচী চলাই চাৰি টুকুৰা হাতীৰ দাঁত উদ্ধাৰ কৰে।
সীমা শুল্ক বিভাগৰ বিষয়াসকলে জনোৱা মতে এই অভিযানৰ জৰিয়তে এটা ডাঙৰ বন্যপ্ৰাণী সৰবৰাহকাৰী চক্ৰৰ পৰিকল্পনা নস্যাৎ কৰা হৈছে। এই নিষিদ্ধ সামগ্ৰীবোৰ আন ঠাইলৈ পঠোৱা বা বিক্ৰী কৰাৰ পূৰ্বেই বিভাগে এইবোৰ জব্দ কৰিবলৈ সক্ষম হয়।
বৰ্তমান বন্যপ্ৰাণী সুৰক্ষা আইনৰ অধীনত হাতীৰ দাঁতকেইটুকুৰা নিজৰ জিম্মাত লৈছে বিভাগে। এই ঘটনাত জড়িত ব্যক্তিসকলৰ লগতে উদ্ধাৰ হোৱা সামগ্ৰীখিনি পৰৱৰ্তী তদন্ত আৰু আইনী ব্যৱস্থাৰ বাবে বন বিভাগৰ হাতত অৰ্পণ কৰা হৈছে বুলি জানিব পৰা গৈছে।
