দৈনিক হাজিৰা কৰা লোকৰ কন্যা। দিনে উপাৰ্জন কৰি খোৱা পৰিয়ালত ডাঙৰ হোৱা। আৰু তেওঁলৈকে হেনো আহিল এক বিশাল কৰ ফাঁকিৰ জাননী! উত্তৰ প্ৰদেশৰ উন্নাও জিলাৰ পৰা পোহৰলৈ আহিছে এনে এক চাঞ্চল্যকৰ তথা উদ্বেগজনক ঘটনা।
সৰ্বভাৰতীয় সংবাদ মাধ্যমত প্ৰকাশিত খবৰ অনুসৰি আয়কৰ বিভাগে উন্নাওৰ দৈনিক হাজিৰা কৰা এজন লোকৰ কন্যালৈ ২০ কোটি টকাৰ কৰ ফাঁকিৰ জাননী প্ৰেৰণ কৰিছে। এই জাননী পোৱাৰ পিছতে দুখীয়া পৰিয়ালটোৰ মূৰৰ ওপৰত আকাশ ভাগি পৰিল। এই বিশাল জাননীখন দেখি পৰিয়ালৰ লোকসকল সম্পূৰ্ণ অবাক আৰু আতংকিত হৈ পৰিছে।
জাননী লাভ কৰা ৰেশমী সবিতা নামৰ যুৱতীগৰাকীয়ে সংবাদ মাধ্যমৰ সন্মুখত কান্দোনত ভাগি পৰে। তেওঁ কয়, “মই গোটেই জীৱনত ২০ হাজাৰ টকা দেখা নাই। তাত ২০ কোটি টকাৰ কৰ ফাঁকিৰ জাননী কেনেকৈ আহিল?”
জাননীখনৰ সত্যতাক লৈ প্ৰশ্ন উত্থাপন কৰি তেওঁ লগতে কয়, “বেংকৰ বাহিৰে মই মোৰ আধাৰ বা পেন কাৰ্ড ক’তো ব্যৱহাৰ কৰা নাই। আনকি মই কোনো কোম্পানী খোলা নাই, গতিকে এই জাননী মোলৈ কিয় প্ৰেৰণ কৰা হ’ল?” বৰ্তমান এই পৰিয়ালটোৱে ন্যায়ৰ আশাত বিভিন্ন চৰকাৰী কাৰ্যালয়ত ঘূৰি ফুৰিছে।
মন কৰিবলগীয়া যে ৰেশমী সবিতা উন্নাওৰ গিৰিজা বাগৰ বাসিন্দা। স্নাতক হোৱাৰ পিছত ৰেশমীয়ে ঘৰতে চিলাইৰ কাম কৰে। পিতৃ অজয় শংকৰ এজন এটা ব্যক্তিগত কাৰখানাৰ শ্ৰমিক। তেওঁলোকৰ ঘৰৰ অৱস্থা চালেই চৰম দৰিদ্ৰতাৰ কথা বুজিব পাৰি। ঘৰত ইটাৰ বেৰ। প্লাষ্টাৰ নাই। মজিয়াখনো কেঁচা। ঘৰৰ চালখন তিৰপালেৰে ঢাকি থোৱা।
যোৱা ৯ মে’ত তেওঁৰ নামত আয়কৰ বিভাগৰ এখন চিঠি ডাকযোগে ৰেশমীৰ ঘৰত উপস্থিত হয়। প্ৰথমে তেওঁলোকে বিষয়টো বুজিবলৈ এজন অধিবক্তাৰ কাষ চাপিছিল। অধিবক্তাই তেওঁলোকক জনাইছিল যে তেওঁলোকৰ ওচৰলৈ ২০ কোটি টকাৰ কৰৰ জাননী আহিছে। আৰু সেই কথাই ৰেশমী আৰু তেওঁৰ পৰিয়ালটোক স্তম্ভিত কৰি তোলে।
ৰেশমীয়ে আশংকা কৰে যে কোনোবাই নিশ্চয় তেওঁলোকক প্ৰতাৰণা কৰিছে। এই বৃহৎ আৰ্থিক দায়বদ্ধতাৰ পৰা মুক্তি পাবলৈ আৰু ন্যায়ৰ আশাত তেওঁ ইতিমধ্যে আয়কৰ বিভাগৰ ৰাজহুৱা অভিযোগ পৰ্টেল, স্থানীয় আৰক্ষী থানা আৰু চাইবাৰ কোষত লিখিত অভিযোগ দাখিল কৰিছে।
অৱশ্যে আয়কৰ বিভাগে এনে অসামঞ্জস্যপূৰ্ণ জাননী প্ৰেৰণ কৰাটো এয়ে প্ৰথম নহয়। ইয়াৰ পূৰ্বেও কেইবাবাৰো এনে ঘটনা সংঘটিত হৈছে। সেয়ে ৰেশমীৰ নথি-পত্ৰ ব্যৱহাৰ কৰি আন কোনোবাই ভুৱা আৰ্থিক লেনদেন কৰিছে নেকি সেই বিষয়েও তদন্ত চলাই আছে প্ৰশাসনে।
