মূৰৰ ছাল শুকান বা তেলীয়া হৈ পৰাৰ ফলত ছালৰ মৃত কোষবোৰ ছিঙি যায় আৰু তেতিয়াই উফিৰ সমস্যাই গা কৰি উঠে। বিশেষকৈ শীতকালত উফিৰ সমস্যা অধিক হোৱা পৰিলক্ষিত হয়।
শীতকালত সাধাৰণতে কেইবাটাও কাৰকে উফি হোৱাৰ সম্ভাৱনা বৃদ্ধি কৰে। মূলতঃ ঠাণ্ডাৰ বাবে মূৰৰ ছালত ৰক্তবাহী নলী সংকুচিত হয় আৰু তাৰ ফলত ছালত তেল আৰু আৰ্দ্ৰতাৰ যোগান কমি যায়।
উফিৰ সমস্যাক লৈ যদি আপুনি ভাৰাক্ৰান্ত হৈ পৰিছে, তেন্তে প্ৰতিকাৰৰ বাবে আপুনি কিছু ঘৰুৱা ব্যৱস্থাৰ সহায় ল’ব পাৰে। এই বিষয়ে জানো আহকঃ
১/ এলোভেৰা
এলোভেৰাৰ প্ৰদাহ নিবাৰণকাৰী গুণ আছে, যি উফিৰ ফলত হোৱা খজুৱতি লাঘৱ কৰিব পাৰে। পাতৰ পৰা সতেজ এলোভেৰা জেল উলিয়াই মূৰৰ ছালত লগাওক। ৩০ মিনিটৰ পৰা এঘণ্টা ধৰি ৰাখিব আৰু তাৰ পিছত চেম্পুৰে ধুই পেলাব।
২/ বেকিং ছ’ডা
বেকিং ছ’ডাই এক্সফ’লিয়েণ্ট হিচাপে কাম কৰে, ছালৰ মৃত কোষবোৰ আঁতৰাই উফি কমায়। প্ৰথমে চুলিখিনি তিয়াই লৈ তাৰ পিছত মূৰৰ ছালত বেকিং ছ’ডা অলপ ঘঁহি লওক। কেইমিনিটমান ৰাখিব, তাৰ পিছত ভালদৰে ধুই পেলাওক। সপ্তাহত এবাৰ এই কাম কৰিব পাৰে।
৩/ নাৰিকল তেল
নাৰিকল তেলে মূৰৰ ছাল আৰ্দ্ৰ কৰি তোলে, শুকানতা কমায়, আৰু চেনিৰ অতিমাত্ৰা বৃদ্ধি ৰোধ কৰে, যাৰ দ্বাৰা উফি কম হয়। অলপ নাৰিকল তেল গৰম কৰি মূৰৰ ছালত মালিচ কৰক। ৰাতিটো ৰাখি পিছদিনা ৰাতিপুৱা চুলি ধুব। সপ্তাহত কেইবাবাৰো এইদৰে কৰিলে উপকৃত হ’ব।
৪/ নিমৰ তেল
নিম তেলত এন্টিফাংগেল আৰু এন্টিবেক্টেৰিয়েল গুণ আছে, যি উফি সৃষ্টিকাৰী ভেঁকুৰৰ বিৰুদ্ধে যুঁজিব পাৰে। কেইটোপালমান নিম তেল নাৰিকল তেলৰ লগত মিহলাই মূৰৰ ছালত মালিচ কৰক। ৩০ মিনিটৰ পৰা এঘণ্টা ধৰি ৰাখিব আৰু তাৰ পিছত চেম্পুৰে ধুই পেলাব। এইদৰে সপ্তাহত এবাৰ বা দুবাৰ ব্যৱহাৰ কৰিলে সুফল পাব।
৫/ চেলিচিলিক এচিড ভিত্তিক চেম্পু
চেলিচিলিক এচিডে মূৰৰ ছালখন ভালদৰে পৰিষ্কাৰ কৰি মৃত ছালৰ কোষবোৰ আঁতৰাই পেলায়। চেলিচিলিক এচিড থকা চেম্পু নিৰ্দেশনা অনুসৰি ব্যৱহাৰ কৰক। এই চেম্পু সপ্তাহত ২-৩ বাৰ ব্যৱহাৰ কৰিলে উপকৃত হ’ব।
