গডছেক বিজেপিয়ে ভাৰত ৰত্ন দিবলৈ বেছি দিন নাই: কংগ্ৰেছ
বিজেপিয়ে বিনায়ক দামোদৰ চাভাৰকাৰক ভাৰত ৰত্ন দিবলৈ আগবঢ়া কাৰ্য্যক গৰিহনা দি অসমৰ কংগ্ৰেছ নেতা দেৱব্ৰত শইকীয়াই বৃহস্পতিবাৰে কৈছে যে শাসক দলটোৱে নাথুৰাম গডছেকো এই সন্মানৰ বাবে মনোনীত কৰিবলৈ আৰু বেছি দিন নাই।
অসম বিধান সভাৰ বিৰোধী দলপতিজনে কয় যে এই পদক্ষেপে ঐতিহাসিক বাস্তৱতা খণ্ডনৰ চেষ্টা কৰিছে আৰু ই “বিকাশ” বোলা মৰীচিকাৰ সন্ধানত ভাৰতবাসীয়ে বিজেপিক দিয়া জনাদেশৰ অতি অসৎ অপপ্ৰয়োগ।
চাভাৰকাৰক মৰণোত্তৰভাৱে ভাৰত ৰত্নৰ বাবে মনোনীত কৰা হ’ব বুলি আসন্ন মহাৰাষ্ট্ৰ বিধান সভাৰ নিৰ্বাচনী ইস্তাহাৰত বিজেপিয়ে ঘোষণা কৰিছে।
“চাভাৰকাৰৰ নাম ভাৰত ৰত্নৰ বাবে মনোনীত কৰাটো জাতিৰ পিতা মহাত্মা গান্ধীৰ পবিত্ৰ স্মৃতিৰ প্ৰতি এক তাচ্ছিল্য,” তেওঁ কয়।
“চাভাৰকাৰ আছিল মহাত্মা গান্ধী হত্যা গোচৰৰ সহ-ষড়যন্ত্ৰকাৰী। পৰ্য্যাপ্ত সাক্ষ্য-প্ৰমাণৰ অভাৱত তেওঁক মুকলি কৰি দিয়া হৈছিল যদিও, চৰ্দাৰ বল্লভ ভাই পেটেলৰ দৰে নেতাও চাভাৰকাৰ দোষী বুলি পতিয়ন গৈছিল। চৰ্দাৰ পেটেলে ১৯৪৮ চনৰ ফেব্ৰুৱাৰিত পণ্ডিত জৱাহৰলাল নেহৰুলৈ দিয়া এক পত্ৰত লিখিছিল: ‘চাভাৰকাৰৰ প্ৰত্যক্ষ অধীনত থকা হিন্দু মহাসভাৰ এক কট্টৰ গোটে এই ষড়যন্ত্ৰৰ উমনি দিছিল আৰু ইয়াক কাৰ্য্যকৰী কৰিছিল’।”
শইকীয়াই লগতে কয়, মহাত্মা গান্ধী হত্যাৰ তদন্ত কৰা কাপুৰ আয়োগে হত্যাৰ পিছত “চাভাৰকাৰ আৰু তেওঁৰ গোটটো” থকা বুলি ১৯৬৯ চনত তেওঁলোকৰ প্ৰতিবেদনত ইংগিত দিছিল।
বৃটিশ্বৰাজৰ বিৰোধীৰূপে আত্মপ্ৰকাশ কৰা চাভাৰকাৰে আন্দামানৰ চেলুলাৰ জে’লত ৫০ বছৰৰ বাবে নিৰ্বাসিত হোৱাৰ পিছতে তেওঁৰ আচল ৰং প্ৰকাশ পাইছিল, শইকীয়াই কয়।
“১৯২৪ চনত তেওঁক মুক্তি দিয়া পৰ্য্যন্ত চাভাৰকাৰে বৃটিশ্ব কৰ্তৃপক্ষক বহুকেইখন ক্ষমাভিক্ষাৰ আৱেদন দাখিল কৰিছিল। লক্ষণীয় কথাটো হৈছে তেওঁক জে’লৰ পৰা মুক্তি দিলে অকল বৃটিশ্ব-বিৰোধী কাৰ্য্যকলাপৰ পৰা আঁতৰি থকাৰ শপত দিয়াই নহয়, ভাৰত ত্যাগ আন্দোলনকে ধৰি স্বাধীনতা সংগ্ৰামৰ সৈতে সহযোগিতা নকৰি তেওঁ আচলতে তেওঁৰ শপত পালনো কৰিছিল,” শইকীয়াই কয়।