কেন্দ্ৰীয় স্বাস্থ্যমন্ত্ৰী জে পি নাড্ডাই লোকসভাত এক লিখিত উত্তৰৰ জৰিয়তে দেশৰ চিকিৎসা শিক্ষা আৰু চিকিৎসকৰ উপলব্ধতা সন্দৰ্ভত গুৰুত্বপূৰ্ণ তথ্য সদৰী কৰিছে। তেওঁ সংসদত প্ৰকাশ কৰা অনুসৰি, সমগ্ৰ দেশত চিকিৎসক আৰু জনসংখ্যাৰ বৰ্তমানৰ আনুমানিক অনুপাত হৈছে ১:৭৭৮। ইয়াৰ সমান্তৰালকৈ ৰাষ্ট্ৰীয় চিকিৎসা আয়োগে ২০২৬-২৭ শিক্ষাবৰ্ষৰ বাবে চিকিৎসা বিজ্ঞানৰ স্নাতক পাঠ্যক্ৰমৰ (এম বি বি এছ) আসনৰ ৰাজ্যিকভিত্তিক তালিকাও প্ৰকাশ কৰিছে।
কেন্দ্ৰীয় চৰকাৰে লোকসভাত অৱগত কৰা অনুসৰি, আগন্তুক ২০২৬-২৭ শিক্ষাবৰ্ষৰ বাবে দেশত নতুনকৈ ৯,৯১১ খন এম বি বি এছ আসন সংযোজন কৰা হৈছে। ইয়াৰ ফলত দেশত সৰ্বমুঠ এম বি বি এছ আসনৰ সংখ্যা ১,৩৬,৯৩৯ খনলৈ বৃদ্ধি পাইছে। ইয়াৰ পূৰ্বে ২০২৩-২৪ শিক্ষাবৰ্ষত দেশত এম বি বি এছ আসনৰ সংখ্যা ১,০৯,১১৫ খন আছিল যিটো ২০২৫-২৬ বৰ্ষত ১,২৮,৯৭৬ খনলৈ বৃদ্ধি পাইছিল। আনহাতে, স্নাতকোত্তৰ (পি জি) চিকিৎসা বিজ্ঞানৰ আসনৰ সংখ্যাও একেটা সময়ছোৱাত অৰ্থাৎ ২০২৩-২৪ বৰ্ষৰ ৩১,১৮৫ খনৰ পৰা ২০২৫-২৬ বৰ্ষত ৮৬,৩৬০ খনলৈ বৃদ্ধি পাইছে বুলি চৰকাৰী তথ্যত প্ৰকাশ পাইছে।
দেশৰ স্বাস্থ্য খণ্ডৰ আন্তঃগাঁথনিৰ ওপৰত আলোকপাত কৰি স্বাস্থ্যমন্ত্ৰীগৰাকীয়ে পঞ্জীয়নভুক্ত এলোপেথিক আৰু আয়ুষ চিকিৎসকৰ উপলব্ধতাৰ ওপৰত ভিত্তি কৰি চিকিৎসক আৰু জনসংখ্যাৰ অনুপাত নিৰ্ধাৰণ কৰা বুলি জানিবলৈ দিয়ে। ইণ্ডিয়ান মেডিকেল ৰেজিষ্টাৰৰ তথ্য অনুসৰি, বৰ্তমান দেশত ১৫,৩৫,১৫৫ গৰাকী পঞ্জীয়নভুক্ত এলোপেথিক চিকিৎসক আছে। ইয়াৰ লগতে আয়ুষ চিকিৎসা পদ্ধতিৰ অধীনত ৭,৫১,৭৬৮ গৰাকী চিকিৎসক পঞ্জীয়নভুক্ত হৈ আছে, যাৰ ফলত দেশত মুঠ পঞ্জীয়নভুক্ত চিকিৎসকৰ সংখ্যা ২২,৮৬,৯২৩ গৰাকীলৈ বৃদ্ধি পাইছে।
