তিনিচুকীয়া জিলাৰ শদিয়া অমৰপুৰৰ দিবাং ঘাটৰ সমীপত দিবাং নদীৰ বুকুত শুকুৰবাৰে এটা উৱলি যোৱা মৃতদেহ উদ্ধাৰ হয়।
উদ্ধাৰহোৱা মৃতদেহটো ১৬ অক্টোবৰৰ পৰা দিবাং নদীত সন্ধানহীন হৈ থকা ১৬ বছৰীয়া কিশোৰ দিলীপ পেগু ওৰফে লিম্বুৰ বুলি চিনাক্ত কৰা হৈছে।
দিলীপ পেগু অমৰপুৰ পাঁচঘৰীয়া গাঁৱৰ দিব্যধৰ পেগুৰ পুত্ৰ।
শুকুৰবাৰে ৰাতিপুৱা স্থানীয় ৰাইজে দিবাং নদীত ওপঙি থকা অৱস্থাত এটা মৃতদেহ প্ৰত্যক্ষ কৰি স্থানীয় আৰক্ষীক খবৰ দিয়ে।
খবৰ পাই আৰক্ষী ঘটনাস্থলীত উপস্থিত হৈ নদীৰ পৰা মৃতদেহটো উদ্ধাৰ কৰে আৰু মৰণোত্তৰ পৰীক্ষাৰ বাবে প্ৰেৰণ কৰে।
উল্লেখযোগ্য যে, যোৱা ১৬ অক্টোবৰত অমৰপুৰৰ দিবাং নদীৰ চাপৰিত গৰু খুটিলৈ যাবৰ বাবে দিবাং নদী সাঁতুৰি পাৰ হ’বলৈ চেষ্টা কৰাৰ পাছৰে পৰা নদীৰ বুকুত সন্ধানহীন হৈ আছিল কিশোৰগৰাকী।
সন্ধানহীন হোৱাৰ আঠদিন পাছত শুকুৰবাৰে দিবাং ঘাটৰ পৰা প্ৰায় ৫০০ মিটাৰ দূৰত দিলীপ পেগুৰ মৃতদেহটো উদ্ধাৰ হয়।
লিম্বুৰ মৃতদেহ উদ্ধাৰৰ খবৰ বিয়পি পৰাৰ পাছতে অঞ্চলটোত শোকৰ ছাঁ পৰিছে।
