নগাঁও জিলাৰ শালনা আঞ্চলিক বন কাৰ্যালয়ৰ অধীনৰ উদমাৰী উপ খণ্ড বন কাৰ্যালয়ৰ অন্তৰ্গত গেন্ধালিত আজি এটা বনৰীয়া হাতীৰ অৰ্ধ গলিত মৃতদেহ উদ্ধাৰ হোৱা ঘটনাই সমগ্ৰ অঞ্চলতে তীব্ৰ চাঞ্চল্যৰ সৃষ্টি কৰিছে।
জানিব পৰা মতে আজি দুপৰীয়া গেন্ধালি বেবেজীয়াৰ ধাননি পথাৰত স্থানীয় কেইজনমান লোকে এটা বনৰীয়া হাতীৰ অৰ্ধ গলিত মৃতদেহ প্ৰত্যক্ষ কৰি বন বিভাগত খবৰ দিয়ে। ইয়াৰ লগে লগে মৃত হাতীটোক চাবলৈ ঠাইখিনিলৈ স্থানীয় লোকে ভিৰ কৰা পৰিলক্ষিত হয়।
পৰৱৰ্তী সময়ত শালনা আঞ্চলিক বন কাৰ্যালয়ৰ অধীনৰ উদমাৰী উপ বন খণ্ড কাৰ্যালয়ৰ বনকৰ্মীসহ শালনাৰ ৰেঞ্জাৰ চেলিম আহমেদ ঘটনাস্থলীত উপস্থিত হৈ প্ৰায় ৬ বছৰীয়া মখনা হাতীটো উদ্ধাৰ কৰাৰ লগতে চামগুৰি পশু চিকিৎসালয়ৰ চিকিৎসক প্ৰশান্ত মজুমদাৰে ইয়াৰ মৰণোত্তৰ পৰীক্ষা কৰি সেই স্থানতে হাতীটোক পুতি থয় বুলি বন বিভাগৰ সূত্ৰে প্ৰকাশ কৰিছে।
বিষাক্ত দব্য সেৱন কৰাৰ ফলতে প্ৰায় তিনি চাৰি দিন মানৰ আগতে হাতীটোৰ মৃত্যু হোৱা বুলি বন বিভাগে সন্দেহ প্ৰকাশ কৰিছে।
