শিৱসাগৰ চহৰৰ সমীপৰ দৰিকা নৈ আৰু কুকুৰাপহীয়া অঞ্চলৰ সংযোগী দৰিকা দলঙৰ তলত পানীত উপঙি থকা অৱস্থাত বুধবাৰে এজন ব্যক্তিৰ মৃতদেহ স্থানীয় ৰাইজে প্ৰত্যক্ষ কৰে।
ঘটনাটোৰ সন্দৰ্ভত স্থানীয় ৰাইজে আৰক্ষীক খবৰ দিয়াত ঘটনাস্থলীত শিৱসাগৰ জিলা দণ্ডাধীশ’ ৰন্টু বৰুৱাৰ লগতে সদৰ আৰক্ষী বাহিনীৰ এটা দ’ল উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে শিৱসাগৰ অসমাৰিক চিকিৎসালয়লৈ প্ৰেৰণ কৰে।
উদ্ধাৰ হোৱা মৃতদেহটো শিৱসাগৰ চহৰৰ হাবিৰাম বৰা পথৰ ৩৭ বছৰীয়া সঞ্জীব বৰা বুলি আত্মীয় তথা পৰিয়ালবৰ্গই চিনাক্ত কৰিছে ।
মৃত ব্যক্তিজনৰ পৰিয়ালৰ পৰা জানিব পৰা মতে যোৱা দেওবাৰ অথাৰ্ৎ ৬ জুনৰ আবেলি ৪ বজাৰ পৰা সঞ্জীব বৰা সন্ধানহীন হৈ আছিল।
আনহাতে, পৰিয়ালৰ লোকে মৃতদেহটো চিনাক্ত কৰাৰ লগতে মৃতদেহটো প্ৰত্যক্ষ কৰি এয়া এক হত্যাকাণ্ড বুলি সন্দেহ প্ৰকাশ কৰিছে ।
বৰ্তমানলৈ আৰক্ষীৰ তদন্ত অব্যাহত ৰাখিছে যদিও উদ্ধাৰ হোৱা ব্যক্তিজনৰ কিদৰে মৃত্যু হ’ল ইয়াৰ প্ৰকৃত তথ্য বা ৰহস্য জানিব পৰা হোৱা নাই।
মৰোণোত্তৰ পৰীক্ষা আৰু আৰক্ষীৰ সঠিক তদন্তৰ পাছতহে সম্পূৰ্ণ ঘটনটো পোহৰলৈ আহিব বুলি ধাৰণা কৰা হৈছে।