দিনটোৰ শ্ৰেণীসমূহ শেষ কৰি মহাবিদ্যালয়ৰ কেন্টিনলৈ খাবলৈ আহিছিল এজন ছাত্ৰ৷ছাত্ৰজনে দাইলত কিবা এটা ওপঙি থকা দেখিলে। কেইছেকেণ্ডমানৰ ভিতৰতে তেওঁৰ হাত-ভৰি ঠাণ্ডা হৈ পৰিল। দাইলত ওপঙি থকা সাপ দেখি আতংকিত হৈ ছাত্ৰজনে চিঞৰিবলৈ ধৰিলে। কিন্তু সেই সময়লৈকে বহু ছাত্ৰ-ছাত্ৰীয়ে সেই দাইল খাইছিল। ইয়াৰ পাছত ছাত্ৰ-ছাত্ৰীসকল অসুস্থ হোৱাৰ খবৰ আহিবলৈ ধৰিলে।
আইচক্ৰীমত আঙুলিৰ টুকুৰা পোৱাৰ ঠিক পাছতেই কলেজৰ কেন্টিনত উদ্ধাৰ হয় এটা মৃত সাপ। বিহাৰৰ এখন চৰকাৰী অভিযান্ত্ৰিক মহাবিদ্যালয়ত সংঘটিত হৈছে এই ঘটনা। কেন্টিনত বিষাক্ত খাদ্য খোৱাৰ পাছত বহু ছাত্ৰ-ছাত্ৰীৰ পেটৰ বিষ আৰু বমি হয়। এই ঘটনাত প্ৰায় ১৫ জন ছাত্ৰ-ছাত্ৰী অসুস্থ হৈ পৰে।তেওঁলোকক পাছত ওচৰৰ চিকিৎসালয়ত ভৰ্তি কৰোৱা হয়।
ইয়াৰ পূৰ্বেও কেইবাবাৰো মহাবিদ্যালয় কৰ্তৃপক্ষক খাদ্যৰ মানদণ্ডৰ অভিযোগ উত্থাপন কৰা বুলি ছাত্ৰ-ছাত্ৰীসকলে অভিযোগ কৰে।
ঘটনা সন্দৰ্ভত জানিব পৰাৰ পাছত বাংকা জিলাৰ জিলা দণ্ডাধীশ অংশুল কুমাৰ, মহকুমাধিপতি আৰু মহকুমা আৰক্ষী বিষয়াই মহাবিদ্যালয়খন পৰিদৰ্শন কৰে। বিষয়টোৰ তদন্ত কৰাৰ প্ৰতিশ্ৰুতি দিয়ে। ইতিমধ্যে কৰ্তৃপক্ষই আতংকিত হৈ পৰিছে। কেন্টিনৰ খাদ্য যোগানৰ লগত জড়িত কোম্পানী বা বিক্ৰেতাকো জৰিমনা বিহা হৈছে। কেটাৰিং কোম্পানীটোও সলনি কৰা হ’ব বুলিও খবৰ ওলাইছে।
প্ৰশাসনে স্পষ্টকৈ নিৰ্দেশ দিছে, এতিয়াৰ পৰা ছাত্ৰ-ছাত্ৰীৰ লগতে অধ্যক্ষ আৰু শিক্ষকেও বাধ্যতামূলকভাৱে কেন্টিনত খাদ্য খাব লাগিব। আনহাতে ৰাজ্য চৰকাৰে মহাবিদ্যালয় কৰ্তৃপক্ষক শিক্ষাৰ্থীসকলক পুষ্টিকৰ আৰু স্বাস্থ্যসন্মত খাদ্য যোগান ধৰিবলৈ নিৰ্দেশ দিছে।
