মাজুলী জেংৰাইমুখ আৰক্ষী থানাৰ অন্তৰ্গত শ্ৰীৰাম গাঁও পঞ্চায়তৰ তেলিয়াবাৰী-বঙালকটা সংযোগী বাঁহৰ দলঙৰ টুনী নৈত মঙলবাৰে নিশা এজন যুৱকৰ মৃতদেহ উদ্ধাৰ হোৱাক কেন্দ্ৰ কৰি অঞ্চলটোত চাঞ্চল্যৰ সৃষ্টি হয়।
যুৱকজন বঙালকটা গাঁৱৰ ভাস্কৰ বৰা (২৯) বুলি চিনাক্ত কৰে।
জানিব পৰা মতে বঙালকটা গাঁও নিবাসী প্ৰয়াত মোহন বৰাৰ পুত্ৰ ভাস্কৰ বৰাই সোমবাৰে নিশা ঘৰৰ পৰা ওলাই যোৱাৰ পিছৰে পৰা নিৰুদ্দেশ হৈ আছিল।
ইয়াৰ পিছৰে পৰা পৰিয়ালৰ লোকে বিভিন্ন স্থানত ভাস্কৰক বিচাৰিছিল যদিও সন্ধান উলিওৱাত ব্যৰ্থ হৈছিল। আৰু অৱশেষত মঙলবাৰে সন্ধিয়া তেলিয়াবাৰী-বঙালকটা সংযোগী বাঁহৰ দলঙৰ তলত ওপঙি থকা অৱস্থাত যুৱকজনৰ মৃতদেহ উদ্ধাৰ হয়।
স্থানীয় কোনো লোকে দলঙৰ ওপৰেৰে পাৰ হ’বলৈ লওতেই মৃতদেহটো প্ৰত্যক্ষ কৰে।
জেংৰাইমুখ আৰক্ষী থানাক খবৰ দিয়াত আৰক্ষীৰ লোক উপস্থিত হৈ মৃতদেহটোৰ মৰণোত্তৰ পৰীক্ষাৰ ব্যৱস্থা কৰে। ইফালে এইয়া আত্মহত্যা হ’ব পাৰে বুলি সন্দেহ প্ৰকাশ কৰিছে স্থানীয় লোকে।
