বোকাখাতৰ বৰজুৰিত যোৱা ১৮ আগষ্টত পথৰ কাষৰ চাহ বাগিচাত অচিনাক্ত মৃতদেহ উদ্ধাৰ হোৱা ঘটনাৰ সবিশেষ তথ্য সমপ্ৰতি পোহৰলৈ আহিছে।
নিহত লোকজন হৈছে বৰপেটাৰ নুৰুদ্দিন খণ্ডাইটৰ, তেওঁক হত্যা কৰা হৈছিল বুলি আৰক্ষীৰ অনুসন্ধানত পোহৰলৈ আহিছে। আৰক্ষীৰ মতে নৰুদ্দিন তিলক লজিচটিক ট্ৰেন্সপৰ্ট নামৰ কোম্পানীটোৰ এখন ট্ৰাকৰ চালক আছিল।
উল্লেখযোগ্য যে মৃতদেহটো উদ্ধাৰ হোৱাৰ পিছত বোকাখাত আৰক্ষীয়ে ঘটনা সন্দৰ্ভত এটা গোচৰ ৰুজু কৰি তদন্ত আৰম্ভ কৰিছিল।
বোকাখাত থানাৰ উপ পৰিদৰ্শক দেবেন বৰাৰ নেতৃত্বত চলোৱা তদন্তত কালি (২৪ আগষ্ট)ৰ ৰাতি ঘটনাৰ সৈতে জড়িত থকাৰ অভিযোগত বোকাখাত বৰজুৰিৰ পৰা গোপাল শইকীয়া, উৎপল বৰা আৰু ৰজনী কাৰ্ডঙক আটক কৰা হয়।
প্ৰাপ্ত তথ্য মতে নুৰুদ্দিনে তেওঁ চলোৱা এ এছ ০১ কে চি ০৮৬২ নম্বৰৰ ট্ৰাকখনত সোনাপুৰৰ কমাৰকুচিত থকা চাৰাণ ইণ্ড্ৰাষ্টিচ পৰা ৫০০ কাৰ্টুন মদলৈ ১৮ আগষ্টত যোৰহাটৰ অজয় দত্ত বণ্ডেট ৱাইৰ হাউচলৈ গৈ আছিল।
নুৰুদ্দিনৰ লগত যাত্ৰী হিচাপে অহা জনৈক দিপাঙ্কৰ দাস আৰু এণ্টনী কাৰ্ডং নামৰ যুৱক দুজনে বোকাখাতৰ বৰজুৰিৰ ধৃত যুৱক কেইজনৰ সৈতে লগ হৈ নুৰুদ্দিনক হত্যা কৰি মদখিনি গোপনে বিক্ৰী কৰাৰ পৰিকল্পনা কৰিছিল।
পৰিকল্পনা অনুসৰি ১৮ আগষ্টত বৰজুৰিৰ এণ্টনী কাৰ্ডঙে বৰজুৰিৰ পৰা আমনিলৈ গৈ দিপাঙ্কৰ দাস আৰু নুৰুদ্দিনক লগ কৰিছিল। দিপাঙ্কৰ আৰু এন্টনীয়ে গাড়ীৰ ভিতৰতে নুৰুদ্দিনক হত্যা কৰি বৰজুৰিত পথৰ দাঁতিৰ চাহ বাগিছাৰ নলাত পেলাই মদ ভৰ্তি ট্ৰাকখন লৈ গৈছিল বুলি আৰক্ষীয়ে জনাইছে।
ঘটনাৰ পিছত আৰক্ষীয়ে বৰজুৰিৰ ৰজনী কাৰ্ডংৰ বাসগৃহৰ পৰা ৪২৪ কাৰ্টুন মদ উদ্ধাৰ কৰাৰ লগতে ৰজনী কাৰ্ডং, গোপাল শইতীয়া আৰু উৎপল বৰাক আটক কৰে ৷
আনহাতে ঘটনাৰ মূল অভিযুক্ত এন্টনী কাৰ্ডং আৰু দিপাঙ্কৰ দাস সম্প্ৰতি পলাতক অৱস্থাত আছে। উল্লেখযোগ্য যে নুৰুদ্দিনক হত্যা কৰাৰ পূৰ্বে ধৃত গোপাল শইকীয়াই মদ বিক্ৰীৰ বাবে বোকাখাতৰ ৱাইন চপৰ লগত যোগাযোগ কৰিছিল বুলি আৰক্ষীৰ সূত্ৰত প্ৰকাশ।
