নামনি অসমৰ ধুবুৰী জিলাৰ চাপৰ চক্ৰৰ(circle) অন্তৰ্গত শালকোছা আৰক্ষী চকীৰ পৰা অলপ দূৰত কুমৰিগাঁৱত ৰেল লাইনৰ কাষতে থকা পুখুৰী সদৃশ এটি গাঁতৰ পৰা ফুলকুমলীয়া দুই ভগ্নীৰ মৃতদেহ উদ্ধাৰ হোৱাৰ ঘটনাই ৰাইজৰ মাজত তীব্ৰ চাঞ্চল্যৰ সৃষ্টি কৰাৰ লগতে অঞ্চলজুৰি গভীৰ শোকৰ ছাঁ পেলাইছে।
জানিবপৰা মতে শালকোছা বাংলাৰ ওচৰৰে থকা গেৰাভিটা গাঁৱৰ দুই ভাই-ককাই ক্ৰমে দেৱজিত নাথ আৰু বেণুধৰ নাথৰ দুই কন্যা অনিন্দিতা নাথ(১১) আৰু নিহাৰিকা নাথ(১০) কালি ঘৰৰ ওচৰতে নতুনকৈ কৈ নিৰ্মান কৰা ৰেল লাইনৰ ওপৰত খেলিবলৈ ওলাই গৈ ঘৰলৈ উভতি অহা নাছিল। ঘৰলৈ দুয়োটি শিশু উভতি নহা দেখি পৰিয়াল আৰু ওচৰত চুবুৰীয়াই নানা ঠািইত বিচাৰ-খোচাৰ কৰে যদিও ক’তো বিচাৰি নাপাই শালকোছা আৰক্ষী চকীত এখন এজাহাৰ দাখিল কৰে ।
গোটেই দিন নিৰুদেশ হৈ থকাৰ পিছত নিশা সন্ধান পোৱা যায়।পিছত নিশা প্ৰায় দহ মান বজাত জিলা আৰক্ষী অধীক্ষক আনন্দ মিশ্রই তৎপৰতাৰে ধুবুৰীৰ পৰা SDRF বাহিনী লৈ আহি ৰেল লাইনৰ কাষত থকা কুমৰিগাঁৱৰ উক্ত পুখুৰীৰ পৰা দুই ভগ্নীৰ মৃতদেহ উদ্ধাৰ কৰে।
ঘটনাস্থলীত এছ পি আনন্দ মিশ্রৰ লগতে চক্ৰ-বিষয়া নৱজ্যোতি দাস , SDPO ভাৰ্গৱমুনি দাস, শালকোছা আৰক্ষী আৰু কিছু স্থানীয় লোক উপস্থিত আছিল।
উদ্ধাৰকাৰ্য সম্পূৰ্ণ হোৱাৰ পিছত নিশা প্ৰায় দুই বজাত মৃতদেহ দুটা চাপৰ থানাত আনি ৰখা হয়।
আজি দিনৰ প্ৰায় ১১ বজাত দুই ভগ্নীৰ মৃতদেহ মৰণোত্তৰ পৰীক্ষা কৰোৱাৰ বাবে ধুবুৰী অসামৰিক চিকিৎসালয়লৈ প্ৰেৰণ কৰা হৈছে। ইপিনে এই হৃদয়বিদাৰক ঘটনা কেনেকৈ ঘটিছে তাকেলৈ বহুতৰে মনত সন্দেহৰ সৃষ্টি হৈছে। ৰাইজে সমগ্ৰ ঘটনাৰ উচিত তদন্ত হব বুলি আশা প্ৰকাশ কৰিছে।