হোটেল ঋতুৰাজৰ কৰ্মচাৰী হেমেনৰ মৃত্যুক হত্যা বুলি সন্দেহ; আত্মীয় উপস্থিত নোহোৱাকৈ মৃতদেহ নমোৱাত ক্ষোভ

গুৱাহাটী মহানগৰীৰ হোটেল ঋতুৰাজত চিপ লোৱা অৱস্থাত মৃতদেহ উদ্ধাৰ হোৱা হোটেলখনৰে কৰ্মচাৰী হেমেন পাঠকৰ পৰিয়ালটোৱে ইয়াক পৰিকল্পিত হত্যাকাণ্ড বুলি দাবী কৰিছে আৰু তদন্ত কৰি দোষীক শাস্তিৰ দাবী কৰে।

১৩ আগষ্টত হেমেনৰ মৃতদেহটো হোটেলখনৰ ৬নম্বৰ মহলাত চিপ লোৱা অৱস্থাত উদ্ধাৰ হৈছিল। তেওঁৰ ঘৰ কামৰূপ গ্ৰাম্যৰ ক্ষুদ্ৰ ডিমুত। পৰিয়ালৰ মতে, হেমেন বিগত প্ৰায় ৮বছৰ ধৰি হোটেলখনত কৰ্মৰত আছিল।

ভৰলুমুখ আৰক্ষীয়ে  প্ৰাথমিক তদন্তত আত্মহত্যা বুলি সন্দেহ কৰিছে যদিও এই কথা মানি ল’ব পৰা নাই পৰিয়ালৰ লোকে।

আনহাতে পৰিয়ালৰ কোনো লোক উপস্থিত নোহোৱাকৈয়ে ভৰুলুমুখ আৰক্ষীয়ে মৃতদেহটো নমাই থানালৈ অনা কাৰ্য্যতো ক্ষুব্ধ হৈছে মৃত হেমেনৰ আত্মীয়সকল।

ঘটনাৰ উচিত তদন্তৰ দাবী কৰি পৰিয়ালৰ লোকে ১৩ আগষ্টত ভৰলুমুখ আৰক্ষী থানাত উপস্থিত হৈ এখন এজাহাৰ দাখিল কৰি ইয়াৰ উচিত তদন্ত কৰাৰ দাবী তুলিছে।