ৰাজতন্ত্ৰ ঘূৰাই অনাৰ দাবীত ৰাজপথলৈ ওলাই আহিছে নেপালৰ একাংশ জনসাধাৰণ। হিন্দু ৰাষ্ট্ৰ ঘূৰাই অনাৰ দাবীতো তেওঁলোক সৰৱ হৈ পৰিছে।
এই দুটা দাবীত প্ৰতিবাদত উত্তাল হৈ পৰিছে নেপাল। ৰাজধানী কাঠমাণ্ডুকে ধৰি দেশৰ বহু চহৰত জনজীৱন স্তব্ধ হৈ পৰিছে। জাৰি কৰা হৈছে কাৰ্ফিউ।
আইন-শৃংখলাৰ পৰিস্থিতিৰ সৈতে মোকাবিলা কৰিবলৈ প্ৰশাসনে আৰক্ষীৰ উপৰিও সেনাও মোতায়েন কৰিছে। বহু অঞ্চলত ইণ্টাৰনেট বন্ধ হৈ পৰিছে।
শুকুৰবাৰৰ প্ৰতিবাদত বহু চৰকাৰী আৰু বেচৰকাৰী প্ৰতিষ্ঠানৰ ব্যাপক ক্ষতিসাধন হয়। প্ৰতিবাদকাৰীয়ে একাধিক শ্বপিং মলত অগ্নিসংযোগ কৰে। সংবাদ মাধ্যমৰ কাৰ্যালয়তো আক্ৰমণ সংঘটিত হয়।
গণতন্ত্ৰপন্থীসকলেও বিপৰীত পথ গ্ৰহণ কৰে। ৰাজতন্ত্ৰ পুনৰুদ্ধাৰৰ দাবীৰ বিৰুদ্ধে কেইবাখনো বৈঠক অনুষ্ঠিত কৰিছে প্ৰাক্তন প্ৰধানমন্ত্ৰী পুষ্পা কমল দাহালে।
ৰাজপথত সমাৱেশ আৰু শোভাযাত্ৰাও উলিয়ায়। মুঠৰ ওপৰত পৰিস্থিতি উত্তেজিতপূৰ্ণ। প্ৰায় দুটা দশকৰ আগতেই নেপালৰ ৰাজতন্ত্ৰৰ অৱসান হৈছিল। দেশখন গণতান্ত্ৰিক গণৰাজ্যত পৰিণত হয়। সংবিধান সংশোধন কৰি হিন্দু ৰাজ্য নেপাল এখন ধৰ্মনিৰপেক্ষ ৰাজ্যত পৰিণত হয়। এতিয়া পুৰণি ব্যৱস্থাটো পুনৰ ঘূৰাই অনাৰ দাবী পুনৰ চৰ্চালৈ আহিছে।
এই ক্ষেত্ৰত ৰজা জ্ঞানেন্দ্ৰ সিং সক্ৰিয় হৈ পৰিছে। বহুদিনৰ পৰা তেওঁ দেশত নাছিল। চলিত মাহৰ আৰম্ভণিতে ধৰ্মীয় ভ্ৰমণ সমাপ্ত কৰি ঘৰলৈ উভতি অহাৰ পিছত তেওঁ ভিডিঅ’ বাৰ্তাৰ জৰিয়তে দেশবাসীক চলি থকা অপশাসনৰ বিৰুদ্ধে মাত মাতিবলৈ আহ্বান জনায়। তাৰ পাছত ৰাজপৰিয়ালৰ ঘনিষ্ঠ দল ৰাষ্ট্ৰীয় প্ৰজাতন্ত্ৰ পাৰ্টি সক্ৰিয় হৈ উঠে। সেই দলটোৱে প্ৰতিবাদৰ আহ্বান জনাইছিল।
তাৎপৰ্যপূৰ্ণ কথাটো হ’ল এই পৰ্যায়ত তেওঁলোকৰ প্ৰথম কাৰ্যসূচীতে দেশখন উত্তাল হৈ পৰিছে। সূত্ৰসমূহে জনোৱা মতে, দৰাচলতে দুৰ্নীতি আৰু সঘনাই চৰকাৰ সলনিৰ কাৰণে নেপালৰ জনসাধাৰণ বিৰক্ত হৈ পৰিছে। গণতন্ত্ৰ ঘূৰি আহিলেও চলি থকা অস্থিৰতাৰ অন্ত পেলাব পৰা নাই।
আভ্যন্তৰীণ অস্থিৰতা আৰু দলসমূহৰ মাজত বুজাবুজিৰ অভাৱত সুস্থিৰ চৰকাৰ গঠন হোৱা নাই। দেশৰ অৰ্থনীতিও বিপৰ্যস্ত। চাকৰিৰ সন্ধানত বিদেশলৈ প্ৰব্ৰজন কৰিছে হাজাৰ হাজাৰ নেপালী যুৱক। এই পৰিস্থিতিক লৈ ক্ষুব্ধ হৈ পৰিছে তেওঁলোকৰ আত্মীয়সকল।
