গোলাঘাট জিলাত বুধবাৰে নিশা সংঘটিত এক ভয়ংকৰ পথ দুৰ্ঘটনাত দুজন লোক থিতাতে নিহত হোৱাৰ লগতে আন চাৰিজন গুৰুতৰভাৱে আহত হয়।
গোলাঘাটৰ মৰঙী সাৰৰ গাঁৱৰ সমীপৰ ৩৯ নং ঘাইপথত বিপৰীত দিশৰ পৰা অহা এখন ডাম্পাৰ আৰু এখন টাটা চুম’ৰ মাজত মুখামুখি সংঘৰ্ষৰ ফালত পথ দুৰ্ঘটনাটো সংঘটিত হৈছিল।
উল্লেখযোগ্য যে দুৰ্ঘটনাটো ইমানেই ভয়ংকৰ আছিল যে টাটা চুম’খন ঘটনাস্থলীতে সম্পূৰ্ণৰূপে ভস্মীভূত হোৱাৰ লগতে তাত থকা দুজন আৰোহী অগ্নিদগ্ধ হৈ থিতাতে নিহত হয়।
জানিব পৰা মতে বোকাখাতৰ পৰা যোৰহাট অভিনুখে গৈ থকা টাটা চুম’খনত আছিল আৱকাৰী ইনটেলিজেণ্জছ ব্যুৰ’ৰ এটা ছজনীয়া দল। তেওঁলোক এটা বিশেষ অভিযানৰ বাবে যোৰহাটলৈ গৈ আছিল বুলি এক সূত্ৰত প্ৰকাশ।
নিহত দুজনৰ ভিতৰত এগৰাকী আবকাৰী পৰিদৰ্শকো আছে। নিহত লোক দুজনৰ নাম চামু মাইবংছা আৰু ৰমেন বংজা। আহত কেইজনক হৰেকৃষ্ণ কুমাৰ, সুন্দৰ ব’ৰি, টানু ইন্জাল আৰু জাহিদুল হক বুলি চিনাক্ত কৰা হৈছে।
আহত চাৰিজনক আৰক্ষী আৰু স্থানীয় লোকৰ সহযোগত গোলাঘটৰ জিলা অসামৰিক চিকিৎসালয়লৈ প্ৰেৰণ কৰা হয় যদিও তেওঁলোকৰ অৱস্থা যথেষ্ট সংকটজনক।
আনহাতে দুৰ্ঘটনা সংঘটিত কৰিয়েই গোলাঘাট দিশৰ আহি থকা ডাম্পাৰখনৰ চালক আৰু হেণ্ডিমেন ডাম্পাৰখন তাতে এৰি ঘটনাস্থলীৰ পৰা পলায়ন কৰে।