এটি সদ্যোজাত শিশুৰ মৃত্যুক কেন্দ্ৰ কৰি দেওবাৰে নিশা উত্তপ্ত হৈ পৰে শুৱালকুছিৰ মহাত্মা গান্ধী ৩০খন বিচনাযুক্ত গ্ৰাম্য চিকিৎসালয়। নিশা আৰক্ষীৰ বৃহৎ দল এটা চিকিৎসালয়ত উপস্থিত হৈ পৰিস্থিতি নিয়ন্ত্ৰন কৰে।
ঘটনা অনুসৰি, বামুন্দিৰ কৰৱী ঠাকুৰীয়া নামৰ এগৰাকী প্ৰসূতিয়ে শুৱালকুছি প্ৰাথমিক স্বাস্থ্যকেন্দ্ৰত এটি সন্তান প্ৰসৱ কৰিছিল। পিছে, জন্মৰ পিছতে শিশুটি জীৱিত থকা বুলি কৈও পৰৱৰ্তী পৰ্যায়ত চিকিৎসকে শিশুটিক মৃত ঘোষণা কৰে।
ইপিনে প্ৰসৱ কৰোতে চিকিৎসক নাৰ্ছৰ ভুলৰ বাবে নে আন কেনেকৈ শিশুটিৰ মৃত্যু হ’ল তাক লৈ ৰহস্যৰ সৃষ্টি হয়।
আনহাতে,পৰিয়ালৰ লোকে চিকিৎসক-নাৰ্ছৰ গাফিলতিৰ বাবেই শিশুটিৰ মৃত্যু হোৱাৰ অভিযোগ তোলে। কাৰণ শিশুটিৰ দেহত আঘাতৰ চিন স্পষ্ট হৈ আছিল। শিশুটিৰ পেট আৰু বিভিন্ন অংশত আঘাত স্পষ্ট দেখা গৈছিল। প্ৰসৱ কৰোৱাৰ সময়ত শিশুটিৰ দেহত চিকিৎসকৰ কেচিৰ আঘাত লগাৰ সন্দেহ কৰা হয়।
ইপিনে, এই সন্দৰ্ভত চিকিৎসকে গা এৰা মন্তব্য দিয়াৰ অভিযোগ উত্থাপিত হৈছে। স্বাস্থ্য মন্ত্ৰী হিমন্ত বিশ্ব শৰ্মাৰ সমষ্টিৰ এইখন শুৱালকুছি প্ৰাথমিক চিকিৎসালয়ত পূৰ্বেও ভুল চিকিৎসাত ৰোগীৰ মৃত্যু হোৱাৰ অভিযোগ আছে।
দেওবাৰে সংঘটিত এই ঘটনাত দুৰ্ভগীয়া পৰিয়ালটোৱে এতিয়া ন্যায় বিচাৰিছে। ১০ মাহ অধিক কষ্টেৰে পেটত সযতনে সন্তান ধাৰণ কৰি ৰখাৰ পিছত চিকিৎসকৰ কেচিৰ আঘাতত সন্তানৰ মৃত্যু কোনো পধ্যেই সহজ ভাবে ল’ব পৰা নাই পিতৃ মাতৃয়ে। সেয়েহে, দোষী চিকিৎসকৰ কঠোৰ শাস্তিৰ দাবী কৰিছে পৰিয়ালটোৱে।
ইতিমধ্যে নিশাই চিকিৎসালয়ত শুৱালকুছি আৰক্ষী উপস্থিত হৈ তদন্ত আৰম্ভ কৰিছে।
